由Keanu Reeves主演嘅《John Wick》，憑藉攀攀到肉嘅打鬥場面，加上乾淨利落嘅動作設計，成功吸納大批動作片迷。首集在2014年面世後，票房一集比一集高，四集合共收得近11億美元票房。有見此及，雖然John Wick喺第4集「疑似死亡」，但片商並冇打算就此放棄呢個人氣IP。

最近獅門影業高層Jenefer Brown向外媒《comicbook.com》透露：「呢個電影宇宙將會繼續以令人難以置信嘅方式發展及擴張。接住落嚟會有第一部衍生電影《Ballerina》，我哋急不及待向全世界分享呢部作品。另外，我哋已經宣布正在製作第五部《John Wick》電影，我相信未來仲會有更多衍生作品，包括電視劇及電子遊戲。」被追問到更多劇情細節時，Jenefer Brown就只係表示：「雖然John Wick可能已經死咗，但我哋所有人都屏息以待，等待真相揭曉。」並冇透露Keanu Reeves會否回歸。

事實上，現年60歲嘅Keanu Reeves喺去年12月就放風表示，話自己膝蓋有傷，個心想再拍《John Wick》但唔知身體應唔應付到。而製作人Basil Iwanyk亦曾透露，John Wick喺第四集嘅「疑似死亡」，其實係Keanu Reeve本人主要要求，事關佢覺得拍呢類電影真係好辛苦。照咁睇，Keanu Reeves回歸嘅機會似乎唔高，唔通片商唔介意喺冇Keanu Reeves嘅情況下推出《John Wick 5》？定還是已經傾好會回歸？咁就不得而知喇。