經過多年等待，任天堂終於喺尋晚「Nintendo Direct」直播活動公開Nintendo Switch 2所有資訊，確定新機將於6月5日正式發售，香港售價為HK$3,450，詳情請細閱下文。

Switch 2硬件規格及全新GameChat功能

Switch 2外觀上延續前代設計語言，但螢幕就增大至7.9吋（LCD面板），解像度及刷新率分別提升至1080p及120Hz，並支援HDR及VRR技術。雖然螢幕大咗，但機身厚度同之前一樣係13.9mm，唔會覺得太厚重。機背支架可調角度更大，機頂仲加咗內建麥克風同一個新USB-C接口，用作充電及連接其他配件。除此之外，Switch 2 TV模式亦有大升級，配備內建散熱風扇嘅全新底座，最高支援4K 60fps HDR畫面。雖然機身內存空間提升至256GB，但想擴充容量就必須使用速度更快嘅MicroSD Express卡，換言之初代Switch插緊個張SD卡唔可以拎去Switch 2用。（參考：目前256GB MicroSD Express街價為HK$368）

經過重新設計嘅Joy-Con 2，採用磁吸方式連接機身，SL及SR鍵變得更大，即使用單邊Joy-Con 2打機亦好有手感。兩邊Joy-Con 2內側仲加入咗光學元件，讓玩家可以將控制器當成滑鼠使用，提供更多操作可能性。

自從Switch 2盧山真面目曝光後，唔少玩家都好奇右側Joy-Con嘅全新「C」按鍵有咩功能，而任天堂亦在會上正式揭曉！當中嘅「C」其實係代表Chat咁解，按下就可以開啟全新功能「GameChat」，同其他玩家對話或分享遊戲實時畫面。如果買埋搭配埋專用外接視訊鏡頭（HK$318），仲可以畀朋友睇埋你打機時個肉緊樣。不過呢個功能要訂閱NSO會員先用得，不過2026年3月31日前提供免費試用。

據官方介紹，Switch 2可以遊玩嘅遊戲主要可分為「Switch 2專屬遊戲」、「Switch 2 Edition遊戲」及「Switch遊戲」三種。前者顧名思義就係專為Switch 2而製作嘅遊戲，後兩者則係初代Switch現嘅遊戲，但部分人氣作品會提供「Switch 2 Edition」，畫質更好兼有新功能。例如《超級瑪利歐派對 空前盛會》、《薩爾達傳說 曠野之息》及《薩爾達傳說 王國之淚》。已擁有該遊戲Switch版本嘅玩家，可以花錢購買「升級包」將遊戲升級為Switch 2 Edition，享受更高畫質體驗及全新功能。

今次Switch 2首發遊戲陣容相當鼎盛，不過主要係第三方廠商移植作品，例如《Cyberpunk 2077》、《Elden Ring Tarnished Edition》、《Split Fiction》等等，任天堂自家IP作品相對較少。王牌當然係Mario Kart系列新作Mario Kart World（瑪利歐賽車 世界），除咗傳統賽車玩法，更首次加入開放世界模式，等玩家可以漫遊賽道同朋友影相打卡。其他自家IP作品仲有《Donkey Kong》新作《Donkey Kong Bananza》，玩法類似《超級瑪利歐 奧德賽》，以及由櫻井政博操刀嘅全新星之卡比賽車遊戲《卡比的馭天飛行者》。

但講到最令機迷期待，莫過於由From Software操刀嘅Switch 2獨佔新作《The Duskbloods》，預告片睇落似《Bloodborne》嘅精神續作，預計2026年推出，詳情要等官方後續公布。

Switch 2首發遊戲陣容介紹片：

Nintendo Switch 2香港行貨將於6月5日正式開賣，淨機價為HK$3,450，而連《MarioKart World》嘅同梱包則售HK$3,750。預購會以名額分配活動的形式接受登記，要登記本次活動，須持有Nintendo Account並滿足以下條件，相關詳情預計4月10日在My Nintendo Store另行公布。

1.Nintendo Switch Online的累計加入期間為1年或以上，登記本次活動時亦正處於加入期間。

2.帳號內有Nintendo Switch軟體的遊玩記錄。

資料來源：nintendo