由台灣導演李安執導、改編自中國作家王度廬「鶴－鐵五部曲」嘅2000年電影《臥虎藏龍》，當年於奧斯卡金像獎上大放異彩，亦令荷里活一直念念不忘呢套經典武俠電影嘅成就及票房，多年黎都希望發展出更多續集及衍生作。而據外媒報導，Amazon近日就確認會開拍《臥虎藏龍》劇集版——唔知會唔會成為《青冥寶劍》之流呢？

據《Deadline》報導，《臥》劇集版將會交由《Lucifer》創作人Jason Ning及Apple TV+劇集《For All Mankind》創作人Ron Moore主理，並會於《臥》版權持有人Sony Pictures Television合作。目前未知演員、故事等詳情，但據報劇集版係打算囊括王度廬嘅整個「鶴－鐵五部曲」，所以故事應該會比電影更為龐大——《臥虎藏龍》係系列第四部嘅書名，而電影劇情則有參雜其他幾部嘅故事。

圖片：臥虎藏龍：青冥寶劍 Facebook

其實今次已經唔係荷里活首次嘗試延伸《臥》呢個IP。如果大家記性好，或者會記得2016年有部由楊紫瓊、甄子丹主演，袁和平執導兼動作設計嘅《臥虎藏龍：青冥寶劍》，其故事就係改編自「鶴－鐵五部曲」第二部《寶劍金釵》。但至於成績嘛…Rotten Tomatoes上專業評分23%、觀眾評分39%，票房就大概係3100萬美金左右，點睇都唔算係成功。記得當初上映時仲有影評質疑點解戲中嘅華人都係講英文……唔知會唔會影響大家對黎緊劇集版嘅期待與信心？

資料來源：Deadline