論國際代表性，奧斯卡金像獎當然遠勝香港金像獎；但你又知唔知道，有一個電影界別係香港金像獎第二屆（1983年）開始就有相關獎項表揚，但奧斯卡去到出年搞第98屆，都係冇相關獎項嘅？答案就係「動作設計」。不過呢個情況就將會於第100屆奧斯卡金像獎有所改變，事關奧斯卡官方日前宣佈會增設特技設計獎！

據奧斯卡官方公告，主辦方美國電影藝術與科學學會日前正式決定於2027年舉行嘅第100屆奧斯卡金像獎中增設「最佳特技設計」（Stunt Design）獎項。學會CEO Bill Kramer及主席Janet Yan於公告中表示：「從早期電影開始，特技設計就是電影製作中不可或缺的一部分，我們很榮幸能向這些有技術又有創意的藝術家的工作致敬，並祝賀他們在此重要時刻所做出的承諾和奉獻。」

目前學會就冇公佈提名資格等相關細節，要等到2027年時先會公佈。

目前奧斯卡涵蓋嘅絕大部份獎項都可謂「源遠流長」，除咗自1927年創始以來就有嘅最佳電影、男女主角等大獎之外，即使係最佳紀錄長片、短片等都已經係上世紀40年代時加入。較為「新」嘅獎項係2001年加入嘅最佳動畫長片，之後就已經係1981年嘅最佳化妝及髮型設計。不過近年學會都積極加入更多獎項以涵蓋更多電影工作者，例如明年就會加入最佳選角（Best Casting）。

資料來源：Oscar