早排Ubisoft先因為採用「彌助」擔任《刺客教條：暗影者》主角，而引起一連串爭議。如今東映竟然無懼風口浪尖，宣布與南非製作公司合作，拍攝一部關於彌助嘅歷史史詩電影《Yasuke – Way Of The Butterfly》（暫名），探討呢位非洲戰士成為「武士」嘅傳奇故事。

據外媒《Deadline》報導，呢部電影將以16世紀非洲王國姆韋尼·馬塔帕（Mwenemutapa）為背景，當時該國同印度、中國及東亞有貿易往來。故事講述彌助從非洲大陸出發，去到封建時代嘅日本，憑藉出色嘅戰士能力及尊嚴，成功得到當地領主賞識，最後獲封為武士。

電影由東映副總裁兼東映京都工作室負責人小嶋雄嗣主導，南非製片人Mandla Dube率領其團隊Pambili Media製作。對於今次合作，小嶋雄嗣表示：「當Pambili Media提出將彌助故事搬上大銀幕時，我哋感到非常興奮及深受啟發。唔單只係一個機會去重新構想一段非凡嘅歷史旅程，同時都好符合東映一直以嚟挑戰類型電影，拍攝大膽故事嘅精神。我哋好自豪可以帶領呢次國際合作。」

而Mandla Dube則表示：「能夠同東映呢種頂尖公司合作，真係夢寐以求嘅事。我哋講述彌助故事時，會致力在文化真實性嘅基礎上，製作一個能夠吸引全球觀眾嘅娛樂性作品。我對今次合作深感榮幸，其期待同東映建立一段長久且富有成果嘅關係。」

究竟呢部「彌助」電影會唔會好似《刺客教條：暗影者》咁引起大炎上呢？各位不妨拭目以待吧。