繼2021年《龍與雀斑公主》後，日本著名動畫導演細田守再推黑暗奇幻新作《Scarlet》（果てしなきスカーレット），預計今年11月在日本搶先上映。而香港方面就暫時未有上映消息，大家要等多陣啦！

《Scarlet》由細田守親自擔任導演、編劇及原作，故事講述公主Scarlet經歷父王被殺害、復仇失敗後，某日突然從「死者之國」中醒來，若然無法喺呢個充滿亡者嘅國度中向宿敵復仇，並抵達「無盡之地」，就會徹底化為虛無。一場超乎想像嘅冒險、無休止嘅戰鬥、跨越時空嘅命運邂逅從此展開。

隨住電影預告公開，細田守亦透過聲明詳細介紹電影靈感來源。提到《Scarlet》早於2022年3月左右開始構思，當時回想起2021年疫情肆虐，全世界好似團結一致對抗病毒，但到咗2022年疫情稍為平息時，世界各地卻突然爆發戰爭，令佢意識到自己生活嘅世界同和平其實非常脆弱。面對呢個唔和平嘅世界，導演認為全世界嘅人都喺搵緊答案，點樣先可以解決紛爭、安心生活，所以佢決定將呢份感受融入作品，創作出呢部電影。

至於點解要以「復仇」為主題，細田守就話觀察到世界各地嘅衝突，往往源於仇恨。「復仇」會引來更多「報復」，形成無止境嘅惡性循環。雖然理智上知道要跳出呢個循環，但實際上並唔係咁容易做到。就似好電影入面嘅主角甚至係我哋自己，一旦被逼入絕境，又會點樣抉擇呢？佢希望藉住呢部作品，引起觀眾對和平同復仇嘅思考。