為展示iPhone嘅強大拍攝性能，近日Apple同日本名導是枝裕和合作，以iPhone 16 Pro拍攝出一部穿越時空愛情短劇《Last Scene》。

呢部作品係iPhone企劃「Shot on iPhone」嘅一部份，由《小偷家族》、《怪物》日本名導是枝裕和執導，並搵嚟曾合作過《海街女孩日記》、《誰調換了我的父親》嘅攝影師瀧本幹也攜手製作，長達27分鐘嘅故事全程採用iPhone 16 Pro拍攝，呈現出一段感人嘅跨時空愛情故事。

《Last Scene》以海濱小鎮鎌倉為背景，故事講編劇倉田（仲野太賀 飾）在改修電視劇《もう恋なんてしない》劇本時，遇上從50年後穿越而來嘅少女由比（福地桃子 飾）。由比自稱係該劇女主角嘅孫女，並告知倉田必需修改劇集最後一幕，否則劇集將會無人問津、喺歷史上徹底消失，而倉田嘅編劇生涯亦就此止步。為咗改變未來，倉田決定同由比一齊改寫劇本。