好可能係拎住部電話睇緊呢篇嘢嘅你，仲記唔記得自己第一部手提電話係咩型號？鍾意打機嘅你，又記唔記得當年第一次玩嘅係邊部主機？如果你都己經有返咁上下年紀，又開始懷念過去嘅美好日子，咁以下日本漫畫家「矢野トシノリ」畫嘅呢幾張「四十年科技發展圖」，或者都會令你感慨良多啦。

#軽い気持ちで描いたら思った以上に反響があった絵

40代の通ってきたデバイスシリーズ pic.twitter.com/jkDi9isxM7

— 矢野トシノリ@c106日曜日南m23ab (@hosimaki) June 13, 2025

話說筆下女角非常好睇嘅「矢野トシノリ」早前於X上發佈咗一系列「40代經歷過的電子設備」圖，描繪咗一個四十歲左右嘅人到目前為止曾經見過、用過、擁有過嘅各種科技產品，當中包括聽歌設備、遊戲主機、手提機、手提電話等。例如手提遊戲機咁，佢嘅第一部機係小學二年級時嘅原祖Gameboy、小學五年級就擁有又貴又大部又食電但有彩Mon嘅Game Gear、十八到二十歲左右換成打橫用嘅Gameboy Advance，然後就係NDS、3DS、Switch，以及PSP、PS Vita等近代主機。

圖片：矢野トシノリ@c106日曜日南m23ab @hosimaki

或者係因為佢呢幾張圖成功捕捉到大部份同齡人嘅回憶，所以上傳之後反應非常好，唔少人都借此分享自己嘅過去——例如有人提到手提機張圖仲漏咗Wonder Swan（香港人或者會記得當年《CoCo!》 力推Wonder Swan同NEO GEO Pocket）。唔知各位睇完呢幾張圖，又會唔會記起嗰幾部曾經陪你渡過青春歲月嘅電子設備呢？