作為荷里活著名大廠之一，Sony一直都冇經營自家串流平台（Sony Picture Core要逐部買或租，嚴格上係VOD），結果就係旗下電影都分佈於各個串流平台之中。不過呢個狀況可能會於未來有所改變，事關有報導指出Sony正考慮收購Warner Bros. Discovery分拆出黎嘅「Warner Bros. Discovery Streaming & Studios」，假若成事，HBO Max就會變成Sony旗下嘅串流平台啦。

本月初時Warner Bros. Discovery宣佈重組及拆分，旗下嘅有線及免費電視台如CNN、Discvoery等將會重組成「Warner Bros. Discovery Global Networks」；而HBO、HBO Max，以及DC Entertainment、DC Studios、Warner Bros Motion Pictures等則會重組成「Warner Bros. Discovery Streaming & Studios」，並由目前嘅CEO David Zaslav領導。

而據《sescoops》報導，Sony認為冇哂有線電視等蝕本貨之後嘅「Warner Bros. Discovery Streaming & Studios」非常吸引，所以考慮緊等明年中完成重組之後將其收歸旗下。

值得留意嘅係，假若真係成功收購，Sony唔單止會擁有HBO Max呢個串流平台，仲會得到擁有Warner Bros. 旗下多個影視IP遊戲改編權嘅Warner Bros. Games。換言之Sony未來將會擁有《Harry Potter》、《Game of Thrones》以及《DC》等遊戲IP，進一步鞏固Playstation嘅遊戲陣營。

資料來源：Sescoops