Ubisoft製作嘅開放世界動作冒險遊戲《Star Wars Outlaws（星球大戰：亡命之徒）》去年8月推出後，銷量遠低於預期，據報首個月只賣出100萬份，遠遠不及同年其他3A大作，例如《鐵拳8》同《人中之龍8》分別喺首日同首周就衝破百萬銷量。Ubisoft執行長Yves Guillemot日前就喺股東大會上，將矛頭直指星戰品牌本身，表示遊戲失利源於星戰IP當時處於「動盪時期」。

據外媒《gamesradar》報導，在最近一次Ubisoft股東大會上，有股東問起：「你哋從《Star Wars Outlaws》嘅銷售失敗﹐學到咩教訓？定價同市場推廣方面又有冇咩新領悟？」Yves Guillemot坦言遊戲確實未達預期，認為遊戲表現受多方因素影響，其中一大關鍵係「發售時機」，指當時星戰品牌正處於一個動盪時期。不過，佢亦承認遊戲本身有瑕疵，發售初期存在唔少問題，所以團隊喺頭幾個星期要積極除錯同修復，呢啲問題無疑影響咗遊戲初期銷量。亦因為呢次教訓，Ubisoft決定押後《Assassin's Creed Shadows（刺客教條：暗影者）》發售日期，進一步打磨遊戲，避免重蹈覆轍。

《Star Wars Outlaws》於2024年8月27日推出，而同年星戰系列就有電視動畫《Star Wars: Tales of the Empire》及真人劇集《The Acolyte》與《Star Wars: Skeleton Crew》播出，但評價及收視率都麻麻，其中《The Acolyte》仲要播咗一季就被腰斬。不過，影視作品評價會有多大程度影響遊戲銷情，呢一點真係非常值得探討。順帶一提，由EA製作、2023年4月推出嘅星戰遊戲《Star Wars Jedi: Survivor》銷情非常理想，在商業上大獲成功，難道係因為2023年嗰陣星戰IP冇咁「動盪」？

Yves Guillemot表示，團隊已經透過更新同除錯大幅改善遊戲體驗，並計劃在今年9月推出Switch 2版本，將為遊戲帶嚟全新樣貌，相關改良亦持續進行中。究竟Switch 2版《Star Wars Outlaws》能否帶嚟新一波銷量就敬請大家拭目以待吧。