雖然《F1》已上映近一個多月，但後勢依然強勁，全球房票在日前正式突破5.45億美元，唔單止係Apple TV+有史以來最賣座嘅院線作品，仲超越咗Brad Pitt喺2013年《World War Z（地球末日戰）》創下嘅5.4億美元票房，成為佢從影30多年嚟最賣座嘅電影。

由荷里活男神Brad Pitt主演、《Top Gun: Maverick（壯志凌雲：獨行俠）》導演操刀嘅賽車電影《F1》，截至目前全球票房已高達5.456億美元，遠超Apple其他院線電影，包括《Napoleon（拿破崙）》2.21億美元、《Killers of the Flower Moon（花月殺手）》1.58億美元、《Argylle（特工亞皆老）》9,600萬美元等等，穩坐Apple院線電影票房冠軍寶座。

據報《F1》製作成本高達2.5億美元，宣傳費仲用咗至少1.25億美元，單靠目前嘅5.456億美元票房絕對未能達到收平衡。不過，考慮到Apple後續會將電影上架到串流平台Apple TV+，繼續透過訂閱服務創造收益，加上電影獲得Mercedes、IWC、Geico、EA Sports、Expensify等多個品牌嘅植入式廣告贊助（《Forbes》估計至少為電影帶來4,000萬美元收入），相信最終唔會蝕大錢嘅。