卻說今年3月Marvel以超長直播公佈《Doomsday》嘅演員名單後，Chris Hemsworth於5月上傳一段長約兩分鐘、集結過去《Thor》電影片段、宣傳花絮嘅影片，片名仲叫做「Thank You! The Legacy of Thor」，令唔少人都以為佢係提前向Thor以至MCU告別，然後好順理成章地猜測Thor一角會於《Doomsday》之後退場。

不過近日Chris Hemsworth為咗宣傳《Limitless: Live Better Now》而接受訪問時，就表示條片其實真係純粹嘅多謝，無其他意思。「其實呢，就係我嘅團體搵咗一堆畫面返黎，然後覺得『呀整條片出黎多謝啲Fans都好喎！』，咁我又真係覺得幾好喎，於是我哋就整咗條片，然後我就去咗做其他嘢。」

對於條片被視為與Thor或MCU告別，Chris Hemsworth就話係「被過份解讀」。「個角色即將會進入新一章，而呢旅程係我演藝生涯中最重要嘅部份，所以條片只係表達感謝，無其他意思。只係大家誤解咗啫！」

事實上喺訪問中，佢似乎亦透露未來會有新嘅《Thor》電影。卻說佢早前為Disney+嘅《Limitless》——即係佢發現自己患阿茲海默症嘅機率比平常人高8到10倍嘅節目——拍攝第二季《Limitless: Live Better Now》時，其中一集本來係打算去滑40尺高嘅巨浪，但結果因為過唔到Disney內部嘅風險評估而唔成事，改為爬上一條200米高嘅水壩。Chris Hemsworth笑言肯定有高層好擔心：「我哋仲要佢去拍《Thor》㗎，唔可以被佢浸親！」

資料來源：The Hollywood Reporter