雖然話就話「前事不提」，但現實中選擇長期伴侶時，好多人都會考慮或在意對方擁有過多少性伴侶，用嚟評估對方是否專一、貪唔貪玩、有冇能力維繫一段穩定關係。不過，最近英國一項大型研究發現，其實性伴侶數目並唔係最關鍵，反而「性經歷喺咩時候發生」更加影響擇偶意願。

最近英國史雲斯大學（Swansea University）研究團隊，訪問咗嚟自五大洲、11個國家、約5,000多名參與者，探討性伴侶數目及發生時間點，會點樣影響大家選擇長期伴侶嘅心態。研究團隊向參與者展示咗一啲「性史時間線」圖表（如上圖所示），每條橫線代表一位潛在交往對象，而線上嘅每條打直細線就代表一位性伴侶。雖然每張圖表嘅性伴侶數目一樣，但發生時間各異：有啲集中喺早年、有啲平均分布、有啲就集中喺最近期。然後再詢問參與者，比較願意同邊一種對象建立長期關係。

結果發現，雖然大部分人對性伴侶較多嘅人感到抗拒，但如果對方嘅性經歷集中喺早年，大家會覺得佢已經「安定」落嚟，比較願意同佢建立長期關係。相反，如果性經歷集中在近期，就會覺得佢未玩夠，交往意願自然較低。

大眾文化一直對評價性史有雙重標準，例如男性有多位性伴侶就被認為係風流倜儻、放蕩不羈，相反女性則會被冠上各種貶義詞。但今次研究發現，無論男參與者定女參與者，對性史評價方式都相當一致，打破咗「女性會因性史受到更多批評」呢個刻板印象。而且最令人驚訝嘅係，唔同國家、文化背景嘅受訪者都有相近嘅性史評價方式，即係傾向接受性伴侶較少、性經歷發生在早年嘅人。呢個發現亦為人類擇偶心理提供咗新角度，原來唔止「Body count」，發生時間點都好重要。