中國遊戲廠商遊戲科學（Game Science）今日在Gamescom 2025正式公開「黑神話」系列全新作品《黑神話：鍾馗》。不過，遊戲目前仍處於非常早期開發階段，甚至只係剛剛「建文件夾」，具體發售日期有待公布。

據官方介紹，《黑神話：鍾馗》故事依舊取材自中國古代神話與民間傳說，並採用與《黑神話：悟空》相同嘅單人動作角色扮演玩法，計劃會喺PC及主流家用主機平台上架。但遊戲科學坦言，遊戲仍處於非常早期開發階段，只係剛剛「新建文件」、實機影片都未有，但為咗保持正常開發節奏，所以率先剪咗條CG預告短片，告知玩家們遊戲已正式進入開發狀態。

至於點解會選擇先製作《黑神話：鍾馗》而唔係《黑神話：悟空》續作。遊戲科學解釋，團隊完成「天命人」故事後，好想嘗試創作一啲更特獨嘅遊戲體驗，同時喺世界觀及敘事上搞搞新意思，而「鍾馗」係經過多方考慮後嘅自然選擇。遊戲科學仲提到，團隊非常有信心能為玩家帶來新變化及新意，並會反思過去嘅不足同遺憾。對於熱愛《黑神話：悟空》嘅玩家，遊戲科學亦承諾：「西遊，不會到此為止。」