日前我哋同大家報導過，Disney因為流失大量年輕男性觀眾而慌忙應對，但其實大家都知Disney電影近年頻頻爆死嘅原因之一，就係佢哋太著重表達DEI（多元、平等、包容）議題，例如LBGTQ+等。近日著名Rapper Snoop Dogg接受Podcast訪問時，就指自己因為帶孫仔去睇《巴斯光年》而被入面嘅女同性女戀情節「嚇親」，搞到唔敢再入場睇戲。某程度上都係Disney目前問題嘅一個縮影。

話說Snoop Dog早前登上Podcast節目《It's Giving》大談婚姻生活，而做咗阿爺嘅Snoop Dogg就提到自己帶孫仔去睇《巴斯光年》嘅經過：「套戲入面Keke Palmer聲演個角色個阿媽突然有個BB，仲係同個女人。我孫仔睇睇下就問我：『Snoop爺爺，點解佢可以同個女人生仔嘅？』我心諗仆街啦，我黎睇戲㗎咋！我同個孫講：『殊！專心睇戲』，『唔制！套戲啱啱講嘅！佢哋兩個女人生咗個仔，點生㗎？』所以我依家唔敢去睇戲啦，睇睇下你哋掉啲我無答案嘅問題黎我點算呀？」

值得一提嘅係，Snoop Dogg並非純粹對同性戀劇情反感，而係唔知點同小朋友解釋呢件非常複雜嘅事，因為佢隨後補充道：「呢班細路黎㗎喎，係咪真係要喺呢個歲數同佢哋講呢啲？」主持人亦附和指，呢啲問題就算真係有諗過都唔易答。

事實上當《巴斯光年》上映時，當中嘅同性戀劇情亦有引起爭議，中東一眾保守國家如沙地阿拉伯、阿聯酋及埃及等更為止禁止《巴》上映。

資料來源：It's Giving、Deadline