最近一款以港式警匪片為題材嘅雙人合作遊戲《港警成雙：來自城寨》公開首部預告，除咗還原出舊式唐樓、九龍城寨、霓虹街道等香港特色場景，仲要有爆晒粗嘅粵語配音對白，而且兩位主角仲有啲似甄子丹同劉德華...

《港警成雙：來自城寨》由獨立遊戲開發團隊Team DF製作（估計係中國嘅工作室，因為佢哋只有官方bilibili、微博及X帳號），係一款支援本地分屏及Steam遠端同樂功能嘅雙人合作遊戲。故事講述幾個喺九龍城寨一起長大嘅好朋友，因為命運作弄而走上唔同嘅人生軌跡，玩家將會扮演多位角色，親身體驗一場經典港產警匪故事，並喺呢場這場兵捉賊遊戲當中，演繹佢哋嘅恩怨情仇，以及此生無法逃離嘅宿命。

據官方介紹，遊戲將重現出舊式唐樓、九龍城寨、霓虹街道等充滿香港特色嘅場景，仲會上演鬧市跳傘、單手捉住「熱狗巴士」、激烈槍戰、港式武打，甚至炸爆天壇大佛等刺激戲碼。而且遊戲全程支援廣東話及國語配音，其中廣東話版預告更爆出「話晒呢度係九龍城寨，班差佬邊到夠膽入嚟呀。」、「做警察就應該要奉公守法。」、「吔屎啦你！」、「醒下啦！」、「屌吖~」等多句地道又抵死嘅對白。

遊戲預計在今年第四季在Steam平台正式推出，目前尚未公布售價。究竟係咪真係有預告入面所講咁多玩法，各位就拭目以待啦！