早前我哋為大家報導過，著名Rapper Snoop Dogg於Podcast節目中指當日帶孫仔去睇Disney嘅《巴斯光年》電影，結果因為當中嘅同性戀情節令佢被個孫問到口啞啞，甚至對入埸睇戲有陰影。事隔幾日，網上傳出Snoop Dogg於IG上留言認錯，但好快其經理人公司就出面澄清，指個留言係假嘅。

話說早前Snoop Dogg登上Podcast節目時，提到自己帶孫仔去睇《巴斯光年》，但當孫仔見到當中嘅女角色與同性伴侶有BB時，就問Snoop Dogg「點解女人同女人可以生仔？」殺咗Snoop Dogg一個措手不及。相關影片曝光之後，唔少媒體都有跟進報導。例如IG「hollywoodunlocked」就剪輯咗美國八卦雜誌《TMZ》嘅節目片段，當中美國跨性別女星「Ts Madison」指Snoop Dogg嘅MV都有女同性戀元素，質疑對方雙重標準。

而正正就喺「hollywoodunlocked」，就疑似有人冒認Snoop Dogg發文道歉。該留言指「我只係一時束手無策，無辦法為我孫仔提供答案。我的同性戀朋友都知道發生了什麼事，他們帶著愛意打電話給我。 不知道怎樣去回答一個6歲小孩是我的錯。請教我如何學習。我並不完美。」

在 Instagram 查看這則貼文

Lauren Gunderson（@lalatellsastory）分享的貼文

該留言一度被視為Snoop Dogg就之前嘅言論認錯，並獲得《Deadline》、《The Hollywood Reporter》等多間著名美國娛樂媒體報導。不過隨住該留言好快被刪去，部份反應快嘅媒體亦將報導下架。直到昨晚Snoop Dogg經理人向外發表聲明，指出該留言「係假嘅！」，算係暫時平息事件。

另一邊廂，《巴斯光年》編劇之一Lauren Gunderson於Snoop Dogg嘅批評見街後於IG發文，指當初係自己決定要於電影中加入同性伴侶，並指：「當我哋寫緊早期版本時，一個重要角色需要一個伴侶，而我好自然地將呢個伴侶寫成『她』而非『他』」佢只自己為呢個情節最終被保留於電影感到高興，並且非常自豪。同時強調「愛就是愛」。

資料來源：The Hollywood Reporter