相信唔使我多介紹，大家都知道喪屍射擊生存遊戲《Left 4 Dead》當年有幾紅，差唔多入親網吧都會見到過半數人玩緊，即使時至今日，其續作《Left 4 Dead 2》每日高峰時間亦有兩萬多名玩家在線。最近《Left 4 Dead》創始人兼首席設計師Mike Booth就宣布，佢正帶領全新工作室開發一款基於L4D元素嘅4人合作射擊遊戲！究竟會係一款真正嘅L4D精神續作，定還是只係好似《Back 4 Blood》咁樣呢？

Mike Booth喺2008年帶領住由佢創辦嘅Turtle Rock Studios推出《Left 4 Dead》，遊戲巧妙咁將喪屍生存元素與四人合作射擊玩法結合，加上每局遊戲都充滿變化，又有好多玩家自製地圖同MOD，令人玩極都唔厭悶，而在翌年推出嘅續集《Left 4 Dead 2》至今仍然有唔少人玩緊。後來，Mike Booth喺2012年離開咗Turtle Rock Studios，並先後加入過暴雪娛樂、Facebook及Resolution Games等公司，目前正在Bad Robot Games擔任首席創意官（CCO）。

最近Mike Booth就喺Reddit上宣布，佢所率領嘅Bad Robot Games正開發緊一款基於《Left 4 Dead》獨特元素嘅四人合作射擊遊戲，仲大賣關子表示：「如果你鍾意我以前作品中嘅團隊合作、緊張刺激及可重玩性元素，咁你可能都會覺得新作非常有趣。」目前遊戲仍處於早期開發階段，甚至連名都未有，但有興趣嘅機迷可以報名參與該遊戲測試。

順帶一提，雖然「L4D元素」呢個字可能會令大家諗起同樣由Turtle Rock Studios開發、被視為L4D精神續作，但玩法完全不同嘅《Back 4 Blood》。不過大家要知道，Mike Booth早喺2012年已經離開咗工作室，佢完全無份參與《Back 4 Blood》嘅開發，所以今次由Mike Booth親自操刀嘅新作，可能會係一款真正嘅L4D精神續作（希望係啦），各位機迷拭目以待吧！