《GTA》除咗係一款電子遊戲，仲可以拎嚟學歷史！近日美國田納西大學宣布，將於明年1月開設全球首個以《GTA》系列為教材嘅大學歷史課程「Grand Theft America: U.S. History Since 1980 through the GTA Video Games」，旨在透過遊戲嘅虛構世界，探討美國1980年代至今嘅社會變遷。

負責執教嘅歷史學教授Tore Olsson接受外媒《IGN》訪問時表示，電子遊戲好擅長創造虛構世界，但同時亦會影響玩家對現實世界嘅睇法，例如《Red Dead Redemption 2》塑造咗玩家對19世紀美國西部嘅印象，《對馬戰鬼》亦塑造咗玩家對封建日本嘅想像。不過，佢嘅課程將會認真看待《GTA》對美國嘅虛構描繪，並以呢個虛構世界為框架，引導學生深入了解過去半世紀美國嘅真實歷史同事件，期望學生讀完呢門課程後，能夠用全新角度看待遊戲。

而在眾多部《GTA》作品中，Tore Olsson最期待係用《GTA SA》嚟做教學題材。因為呢集遊戲以1992年嘅虛構洛杉磯「Los Santos」為背景，講述主角CJ返到家鄉，試圖將毒販趕出社區，仲要救佢哥哥出獄，但被一班腐敗警察百般阻撓。遊戲嘅高潮位係呢班警察被判無罪，結果引發一場針對司法不公嘅大型暴動。好多人都覺得呢段劇情係影射1992年嘅洛杉磯暴動，伕但Tore Olsson就表示實情唔完全係咁，而課程其中一個目標，就係釐清呢場暴動嘅背景與脈絡，包括遊戲有提到嘅部分，同埋更多遊戲未有提到嘅內容。

順帶一提，其實Tore Olsson早喺2021年就試過用《Red Dead Redemption》系列教歷史，當時成功獲得極大回響，後來佢亦因此寫咗一本歷史研究書藉，名為《Red Dead's History: A Video Game, an Obsession, and America's Violent Past》，講述遊戲內容同美國歷史嘅關係。