英國人工智能製作公司Particle6最近推出首位AI演員Tilly Norwood，短短數個月間已吸引多間經理人公司洽談簽約，引起業界關注。消息傳出後，即時惹來大批荷里活演員強烈反對，憂慮AI會「搶飯碗」，同時批評AI難以取代真人嘅情感同細膩演技，並損害真人演員權益。

Particle6創辦人兼演員出身嘅Eline van der Velden，最近在蘇黎世電影節產業論壇上透露，Tilly Norwood喺今年2月剛推出時其實不被睇好，大家普遍反應都係「What’s that?」甚至覺得做法行唔通。但隨住愈來愈多人關注，現時已有多間經理人公司主動洽談合作，團隊亦會計劃喺未來幾個月公布Tilly Norwood會正式加盟邊間經理人公司。

此外，Eline van der Velden早前更喺Linkedin上表示：「觀眾關心嘅係故事，而唔係角色是否有心跳嘅真人，Tilly已經吸引到經理人公司同Fnas嘅關注。人造演員嘅時代並唔係『即將到來』，而係已經到來。」更揚言團隊目標係希望將Tilly變成下一個Scarlett Johansson或Natalie Portman。

翻查資料，Tilly Norwood早於今年5月已經開設Instagram、Facebook同TikTok等社交媒體，模仿真人分享生活點滴。7月時更上傳一段短片，宣布自己接咗演藝生涯第一個角色，參演喜劇短片 《AI Commissioner》：「雖然我可能係AI生成嘅，但係我感受到好真實嘅情緒。而且對未來充滿期待！」

對於Tilly嘅出現，唔少荷里活演員都公開表達不滿。例如金像女配角Whoopi Goldberg就喺節目上直言，AI難以複製真人嘅情感同肢體細節，無論喺觀眾共鳴定演技深度上都無得比。《Matilda（小魔女）》Mara Wilson亦質疑：「既然呢個AI係根據數百個活生生嘅女人合成出嚟，咁點解唔直接聘請佢哋其中一個呢？」至於Emily Blunt睇完Tilly嘅照片後亦不禁驚呼：「吓，認真㗎？呢個係AI？天呀，我哋玩完。真係好恐怖啊。」仲半開玩笑咁話：「各位經理人公司，求下你哋唔好咁簽佢啦，唔好再奪走我哋人與人之間嘅連繫啦。」

View this post on Instagram

A post shared by Tilly Norwood (@tillynorwood)

面對反對聲音，Eline van der Velden就透過聲明回應，強調Tilly只係一件「創意藝術作品」，並唔係要取代真人演員，而係希望好似動畫、CGI或木偶劇咁，成為另一種藝術形式及與敘事工具，為觀眾帶嚟新體驗。