隨住年度電競盛事《英雄聯盟》2025世界大賽喺今日正式開打，官方同步公開今屆主題曲「Sacrifice」MV，由香港歌手G.E.M.鄧紫棋獻唱！

《英雄聯盟》世界大賽自2014年開始，每年都會邀請歌手合作推出主題曲及MV，歌詞主要圍繞奮鬥、傳奇同崛起等熱血主題，配上精彩嘅動畫MV講述選手奮鬥故事，深受機迷歡迎，幾乎每首主題曲MV都錄得破億觀看次數。

繼前年嘅NewJeans「GODS」及去年嘅Linkin Park「Heavy Is The Crown」之後，今年官方邀請到香港歌手G.E.M.鄧紫棋獻唱最新主題曲「Sacrifice」，MV入面仲融入咗Faker、TheShy、Caps、Levi等現役選手經典名場面，例如TheShy喺2018年半決賽用劍魔（Aatrox）喺河道一打四[2:18]，Faker喺2023年半決賽用砂皇（Azir）神開戰[2:29]，而片尾更致敬今年4月因癌症離世嘅S1世界冠軍FNC中路選手Shushei，令人感動。