今年2月時，EON Productions向Amazon MGM Studio出售《007》電影系列版權，意味住開創並掌握系列多年嘅Broccoli家族全面退出創意決策。事件震驚荷里活之餘，亦有唔少人好奇究竟Amazon出咗幾多錢先可以將《007》呢隻金蛋收歸己有。而近日EON公佈嘅財政報告就終於露出端倪：只需2000萬美金！

據《Deadline》報導，EON Production近日向英國有關當居提交最新財報表，當中就揭露咗出售《007》版權嘅財政細節。報表指出公司於今年2月20日與Amazon達成協議，將會出售《007》版權以及一切有關資產，當中包括當年為咗拍《Spectre》 及《No Time To Die》而成立嘅B24及B25兩間子公司。而此次交易則為公司帶來2000萬美金收入，令其去年淨賺1200萬鎊（約1600萬美金）。

據網站《Box Office Mojo》顯示，單單係《No Time To Die》一套戲嘅票房就已經有超過7.7億美金票房，事實上EON當年嘅財政報表亦顯示收入高達2.35億英鎊，換言之2000萬美金就將成個版權賣出去似乎就非常蝕底。不過《Deadline》引述知情人士指，EON出售版權後仍會以聯合經營人身份從後續嘅《007》電影中獲得不同類型嘅回報，例如未來電影或所有衍生產品中都可以拎到分成。所以嗰2000萬美金其實係「首期」或者「簽字費」，並非EON最終能收到嘅錢。

資料來源：Deadline