近年流行電子遊戲改編真人版劇集，繼《The Last of Us》同《Fallout》後，Ubisoft著名遊戲《Far Cry（極地戰嚎）》亦都要拍真人版！FX電視台今日正式宣布，旗下兩位資深製作人Noah Hawley同Rob Mac將聯手製作《Far Cry》真人版劇集，而且會同原著遊戲一樣，每季都會更換全新角色陣容同故事背景，走多季獨立單元劇模式。

Noah Hawley與Rob Mac

呢部真人版劇集將由Noah Hawley同Rob Mac共同主導，前者係《Alien: Earth（異形：地球）》同《Fargo（雪花高離奇命案）》主創；而後者則係美國最長壽真人喜劇《It's Always Sunny in Philadelphia（酒吧五傑）》主創，而且佢仲會親自落場參與演出。

對此，FX娛樂總裁Nick Grad透過新聞稿表示：「FX同Rob Mac、Noah Hawley之前已經合作過六套劇集、合共32季內容，成績相當亮眼。今次佢哋再度聯手製作《Far Cry》劇集，我哋真係非常期待。佢哋一定會用一種原創、引人入勝同極具娛樂性的方式呈現故事。與此同時，我哋都好多謝Ubisoft嘅信任，將呢個深受歡迎嘅IP交由FX改編。」

就咁聽落，呢部劇集似乎唔會「照抄」任何一代原作遊戲劇情，而係基於《Far Cry》世界觀及混亂元素嘅原創故事。究竟最後會變成「魔改」，定還是好似《Fallout》真人劇改編得咁成功，就敬請大家拭目以待。