相信唔少人屋企舊都儲咗啲舊嘢，一來為咗留住回憶，另一方面亦期望佢有日會變得非常值錢。而近日呢種「舊物致富」嘅故事又再次上演。三個住喺美國加州北部嘅兄弟於媽媽嘅遺物中，發現一本保存良好、出版於1939年嘅《超人》漫畫第一集，近日該漫畫成功以912萬美金（女HK$7000萬）賣出，成為史上最貴漫畫——你話我啲《Co-Co!》放多幾廿年有無錢賺呢下？

圖片：Heritage Auctions

話說月初時，有報導指出美國加州有三兄弟於媽媽過世後幫忙整理遺物，然後於媽媽閤樓發現六本舊漫畫，其中一本就係1939年推出嘅《超人》第一期，而且狀況非常好。三兄弟於是將漫畫送去美國CGC (Certified Guaranty Company)進行鑑定，結果得出9.0超高分，而且經認證為第一版，極具收藏價值。

2022年時曾經有8.0評分嘅《超人》第一期以530萬美金成功賣出，而當時史上最貴漫畫為2024年以600萬美金賣出嘅8.5分《Action Comics》第一期。今次嘅9.0《超人》第一期評分比兩者都高，所以當時就已經估計其拍賣價會創下漫畫史新高。

圖片：Heritage Auctions

9.0《超人》第一期最終於Heritage Auctions 11月尾舉行嘅「Comic Books Signature」拍賣會中成功賣出，最終成交價為912萬美金，成功創下同類拍賣新紀錄，亦榮登「史上最貴漫畫寶座」。Heritage Auctions副總裁Lon Allen表示，今次成交創新高除咗同漫畫本身嘅質素有關，更因為有「兄弟於母親遺物發現」嘅感人故事加乘，所以算係可一不可再嘅奇跡。

資料來源：Bleeding Cool