距離《The Witcher 3》推出已經10年，由Ciri擔正嘅《The Witcher 4》目前仍然開發中，最快都要等到2027年先有機會玩到。不過CDPR對系列未來相當有信心，表示因為團隊已全面轉用Unreal Engine 5遊戲引擎，能大幅縮短製作時間，所以有把握喺《The Witcher 4》推出後6年內，再完成埋第五同第六集，組成全新《The Witcher》三部曲。

CDPR在上周公布第三季財報後，行政總裁Michał Nowakowski在投資者問答環節中再次重申，工作室仍然維持「六年內推出全新《The Witcher》三部曲」嘅計劃。換言之，第四集到第五集，以及第五集到第六集之間嘅開發時間將大幅縮短。

如果CDPR真係可能兌現承諾，將會係一個相當驚人嘅壯舉。畢竟舊《The Witcher》三部曲都花咗8年先出齊，而近十年3A大作嘅開發時間又普遍愈來愈長，所以CDPR揚言要喺更短時間內完成全新三部曲，確實令人期待又有啲難以置信。

至於備受期待嘅《The Witcher 4》，官方早前已表明唔會喺2026年內推出，即係最早都要2027年。照咁推論落去，即係《TW5》會喺2030年推出、而《TW6》就喺2033年。不過當中充滿大堆變數，例如CDPR可能要喺《TW4》推出前後處理新舊主機過渡問題；又或者《TW4》推出後負評如潮，搞到CDPR要花時間同資源不斷修復（《Cyberpunk 2077》有辦你睇），拖慢其後兩集開發進度。