隨住《Avatar: Fire and Ash（阿凡達：火與燼）》將於本月上映，James Cameron已經著眼下一個項目，其中包括佢嘅成名作《Terminator（未來戰士）》全新續集。佢透露目前已經寫咗足足3吋厚嘅構思筆記，但亦坦言今次最大挑戰係現實科技發展太快，甚至追過科幻創作，令佢愈來愈難「預視未來」，擔心新作推出後幾年內就會變得過時。

曾編導首兩集《Terminator》嘅金像大導James Cameron，去年曾表示自己正開發一個同《Terminator》有關、但「完全機密」嘅新項目，仲向記者講笑言：「我唔想透露太多，否則可能要派一隻危險嘅機械人處理你。」事隔一年多，佢最近為宣傳新作接受外媒《Gizmodo》訪問時，終於願意透露更多細節。

James Cameron表示，當完成《Avatar: Fire and Ash》宣傳活動後，佢就會開始動筆創作全新《Terminator》：「等到今次宣傳完成，大概一個月後，我就有時間重新投入寫作，逐一思考下一步想拍乜、同埋先後次序等等。我而家手頭上有一大疊筆記（約3吋厚），平時我寫嘅所有劇本都係由呢堆筆記開始。呢啲全部都係我對《Terminator》新電影嘅構想，我之後會專心投入寫劇本。」

不過，James Cameron亦坦言今次最大嘅挑戰，係要確保劇情喺未來唔會過時：「科幻作品而家已經追上，甚至開始壓倒現實。我哋而家活喺一個科幻世界入面，過去只會出現喺科幻小說同電影嘅問題，而家全部都變成真，不得不去面對。我都好難再好似1984年嗰陣咁「預視未來」（首集Terminator上映年份），因為冇人預知到一年、兩年後會變成點。但我希望至少可以將眼光放到未來一兩年之外。」

事實上，全新《Terminator》並非James Cameron手上唯一新項目，佢仲打算拍一套以「廣島原爆」為題材嘅電影，改編自美國作家Charles R. Pellegrino歷史書籍《The Last Train From Hiroshima：The Survivors Look Back（廣島末班列車：1945原爆生還者的真實故事）》，呼應現今國際局勢，提醒人們反思核武。當然，仲有暫定2029同2031年上映嘅《Avatar》第四同五集，不過佢早前已經表明，如果《Avatar: Fire and Ash》票房唔理想，咁後續兩集電影都會唔拍，改為寫書交代。因此，今集已為《Avatar》系列首三集故事做好收尾。