George Clooney過去曾拍過無數愛情電影，而佢本人亦憑著型佬外表多次入選媒體選出嘅「全世界最性感男星」之類嘅名單，係唔少女性嘅夢中情人。不過隨住年齡漸長，繼續要同女星談情說愛就唔係個個受得住——至少佢本人似乎就受唔住——所以近日佢接受《Daily Mail》訪問時就公開宣佈以後會「封咀」唔拍吻戲。

電影《Jay Kelly》劇照

圖片：IMDB

George Clooney早前接受《Daily Mail》訪問時，提到自己對未來戲路嘅規劃。佢話：「我希望可以學Paul Newman咁，『Well，我以後唔會再鍚女㗎啦』。」呢位現年64歲嘅一代男神補充道：「我60歲時同我老婆傾過，我話：『你睇，我係可以同班後生嘅打籃球，我同緊班25歲嘅打添；我個人亦都撐得住，我無走樣。但25年後我就85歲啦喎，呢個唔係你食多幾條高纖燕麥棒就可以改變，係一個真實嘅數字黎嘛。』」言下之意就即係覺得自己已經過咗可以於大銀幕上同人談情說愛嘅階段，所以就主動話唔拍呢類戲。

George Clooney曾於1997及2006年兩度成為《People》選上嘅「全世界最性感男人」

圖片：People

事實上George Clooney早前就已經表達過類似諗法。今年3月佢接受《60分鐘時事雜誌》訪問時，就講過自己唔想同後生一輩爭拍愛情片：「我已經63歲，我唔想去同個25歲嘅男主角爭戲黎做。我份工唔係做呢啲㗎。我唔會再拍愛情片㗎啦。」表明要為後輩讓路。

而另一個原因，應該係同佢2017年迎來一對龍鳳胎有關。上月佢接受《The Times》訪問時，就提到因為自己好遲先有小朋友，所以比起其他人更容易平衡工作與家庭。佢話後生事根本控制唔到自己嘅時間，但依家人老咗、經驗多咗，而且賺到嘅錢夠多，就可以對拍咩戲更加揀擇。相信對佢黎講，與其仲要去拍愛情片，不如返歸陪下老婆仔女好過啦。

資料來源：Daily Mail