自從Tobey Maguire及Andrew Garfield於《Spider-Man: No Way Home》再次披起蜘蛛俠戰衣，坊間就一直有傳Marvel（或者Sony）有意延續二人嘅《蜘蛛俠》電影系列。適逢Tobey版《蜘蛛俠》三部曲導演Sam Raimi近日有新電影《Send Help》上映，四出宣傳嘅佢就不停被問到係咪有機會開拍Tobey版《蜘蛛俠》第四集。有趣嘅係，佢嘅口風於短短幾日內有180度轉變，唔通當中有咩新發展？

話說Sam Raimi近來為咗宣傳新戲《Send Help》不停接受各大傳媒訪問，而記者們都不約而同地問佢Tobey版《蜘蛛俠》第四集嘅可能性。而佢本來嘅答覆就係堅定拒絕，例如上月底接受《Screenrant》訪問時，佢就話佢嘅Peter Parker及Mary Jane Watson「已經遠去」，並指「我唔覺得返去試圖復活我嘅版本係一件合適嘅事」、「拍完我嗰三部之後，我已經將火炬交咗畀其他人，我認為佢哋應該繼續推進目前嘅故事。」睇落就係一個好有禮貌嘅「我唔想拍」啦係咪？但到近日佢口風就有所改變啦！

日前舉行嘅《Send Help》首映紅地氈上，Sam Raimi又被《AP》嘅記者捉住，問多次Tobey版《蜘蛛俠》嘅事，而今次佢嘅答覆係：「係呀，大家都好鍾意喺《No Way Home》嘅佢（Tobey Maguire）、八爪博士（Alfred Molina）同綠魔（Willem Dafoe），所以我估啲小朋友應該會好鍾意見到佢（Tobey）。」隨後佢提到依家Marvel嘅蜘蛛俠（Tom Holland版）好成功，佢認為唔應該打斷嗰邊嘅發展，畀佢拍多部Tobey版，但係佢隨後就補充話：「但我願意拍。如果呢日黎到的話，我好願意拍。」

雖然仍然唔係一個簡單直接嘅「Yes」，但比起之前嘅說法係明顯軟化。或者一眾Tobey版嘅Fans又可以從中見到希望嘅曙光啦！

資料來源：Deadline