2015年嗰場打破多項紀錄嘅「世紀之戰（Fight of the Century）」，雖然Floyd Mayweather以點數取勝，但Manny Pacquiao一直希望能有機會復仇，相隔11年，兩位拳壇傳奇終於再續前緣！兩人已正式達成協議，落實會喺今年9月再次踏上擂台，上演萬眾期待嘅職業拳擊二番戰，並由Netflix獨家直播。

回顧當年一戰，兩位拳王合力創下460萬次PPV（按次付費電視）銷量，以及超過4.1億美元收益嘅驚人歷史紀錄，至今仍無人能破。雖然兩人如今已年近五十（Mayweather 49歲、Pacquiao 47歲），但佢哋一直保持出色體能狀態，近年亦多次喺表演賽中展現出寶刀未老嘅技術。繼早前成功舉辦Tyson對Jake Paul嘅大戰後，Netflix今次再撮合兩位近代傳奇拳手重逢，除咗為拳迷圓夢之外，亦顯示出佢哋積極進軍體育直播市場嘅決心。

呢場遲來嘅重賽，對於兩位傳奇嚟講意義重大。生涯錄得50戰全勝、以防守反擊技術聞名嘅Mayweather，面對老對手依然充滿自信，透過聲明表示：「我曾經贏過Manny一次，今次結局都會係一樣。」至於史上唯一奪得8個不同級別冠軍嘅菲律賓拳王Pacquiao則戰意高昂，誓要打破宿敵嘅不敗紀錄：「拳迷已經等咗好耐，佢哋絕對值得睇到呢場重賽。而且今次會喺 Netflix全球直播，規模肯定更勝從前。我希望為Floyd嘅職業生涯添上唯一一場敗仗，等佢永遠記住係邊個打贏佢。同以往一樣，我會將呢場比賽獻畀全球菲律賓同胞，為菲律賓爭光。」

賽事將於今年9月19日在拉斯維加斯最新地標「Sphere」球體場館舉行，配合現場超巨型環繞螢幕，視覺效果肯定震撼。目前尚未清楚比賽會以咩體重級別進行，以及打幾多個回合，有興趣嘅朋友請密切留意後續消息。