一萬銀三張 Star War浮世繪網上集資

文：MenClub 魏文青　　
POSTED ON 02 Jul 2015

所謂「浮世繪」，其實係指起源於十七世紀日本嘅一種繪畫藝術。「浮世」即係指現代、當代，所以繪畫主題都係世間風情。製作方法就係由原畫師畫出原圖，雕板師喺山櫻木上浮雕出圖案製成「墨板」，再由刷板師上色再印刷。簡單啲黎講就係一種極考手工、心機、時間嘅傳統藝術。但技術傳統，唔代表造出黎嘅嘢都要傳統嘅！為咗令到更多人認識、繼承呢種由江戶時代傳落黎嘅技術，日本精品店「RUNAT」就喺集資網站「MAKUAKE」上發起咗一個「STAR WAR浮世繪」項目！

由年輕繪師兼STAR WAR粉絲石川真澄繪畫原圖，再交由繼承江戶時代技術嘅彫摺師進行製作嘅三款「STAR WAR浮世繪」，每款限定100張。其中90張會單獨發售(售價為54000Yen，約3400港元)，你亦可以用162000Yen (約10300港元)一次過買哂三款，不過名額只限10名，而文青執筆之時就已經淨返一個啫。

咁講到尾都係買畫，都要知道幅畫夠竟係咩樣咩主題！三款入面第一款就名為「星間大戦絵巻暗黒卿堕悪巣俾荼」以黑武士為主題，其中背景個「月亮」其實係「Death Star」，黑武士本人就沐浴喺怨念之火當中。而標題中嘅「堕悪巣俾荼」大概係指「墜落到邪惡之巢受苦」。

而第二幅「星間大戦絵巻惑星補巣の戦い」就係描繪第五集(帝國反擊戰)初段，帝國軍派出AT-AT攻擊冰雪星球「Hoth」嘅畫面。

至於第三幅「星間大戦絵巻阿弥陀羅姫 R弐D弐」就係來自《前傳》。畫中左上角係Anakin Skywalker、紅衣女子係Queen Amidala(Anakin Skywalker的愛人，Luke Skywalker同Princess Leia嘅媽媽)、而隔離嗰個就係《星戰》系列第一主角(?) R2-D2。