1941年嘅漫畫《Detective Comics #48》入面，「蝙蝠俠之父」Bob Kane以一輛開蓬Cord 812為藍本，畫出史上第一架「蝙蝠車」。但其實呢架車當時只係用黎代步(咁人哋真係車黎架嘛)，所以唔似往後嘅蝙蝠車咁又有武器又識變形又盛。成架車同真正嘅Cord 812嘅唯一不同之處，就係車頭多咗個蝙蝠像。

到1966年，著名荷里活改裝車手George Barris為《Batman》電視劇製造出第一輛符合我哋認知嘅「蝙蝠車」－－最起碼，佢係黑色嘅。事實上呢架車係基於Ford車廠於1955年推出嘅概念車「Lincoln Futura」而成，由於架車最後冇投產，於是George Barris喺1960年代用$1美金買咗架車。後來佢就將呢架車改為黑配紅嘅蝙蝠車，當然亦為其加入唔少特別武器。

去到1986，由Frank Miller執筆、被譽為蝙蝠俠漫畫經典之一嘅《The Dark Knight Returns》，就出現咗第一架全坦型嘅蝙蝠車「The War Machine」。老老實實呢架嘢就唔能夠稱得上係「靚」，但因為劇情係講蝙蝠俠對上超人，呢個設計叫做「情有可原」啦。

黎到比較近代嘅1989年添布頓版《蝙蝠俠》，亦即係各位八十後第一部認識嘅蝙蝠車。妯長車身再加後面對鬼咁搶眼嘅翼，基本上影響咗往後所有蝙蝠車。而且除咗有兩枝車頭機關炮之外，仲有聲控Call車服務同全裝甲模式添！

繼續由添布頓導演嘅1992年《Batman Return》上映之時，新動畫《Batman: The Animated Series》亦同時開播。受到充滿歌德暗黑風嘅電影影響，動畫亦係走呢個路線，連帶架蝙蝠車都同1989年嗰間有幾分相似。而又由於佢係動畫、唔需要受物理上嘅限制，所以呢架車除咗識放煙放油放催淚氣，仲有噴射引擎、彈射座位同飛彈。

又返返黎電影版，今次係1995年、由Joel Schumacher執導嘅《Batman Forever》。雖然名義上為「添布頓系列」嘅續集，但連導演都換埋，架車又點會唔換呢？於是有呢架由Babara Ling設計嘅新車。除咗有骨骼感嘅車身，Babara亦為此車加入噴射引擎，四輪轉向，甚至爬牆鋼索等等機關。

《Batman Beyond》係華納於1999年推出嘅新動畫。有別於以往嘅系列，今次行嘅係未來風，所以架蝙蝠車亦充滿未來感－－嚴格上佢唔係「車」黎，因為佢係「飛」嘅。

路蘭執導嘅《黑夜之神》系列(原來已經成十年前…)一向強調嘅係真實感，所以蝙蝠車亦一改以往嘅科幻感，而變成一台高科技嘅戰爭載具。

2014年嘅新漫畫《Batman #25》基本上係重製蝙蝠俠嘅故事，所以畫家Greg Capullo同Danny Miki就決定採用初代蝙蝠車(冇錯，上面紅色嗰部)為藍本，再配以「藍加金」嘅配色……但我覺得好似隻雀……

最新嘅蝙蝠車，新到其實大家只係喺《Batman v Superman》條預告入面望到佢兩眼。但風格明顯受「路蘭系列」影響，偏向戰爭真實風。

bookmygarage