秋裝精選6 大人的小學生書包

文：MenClub 魏文青　　
POSTED ON 29 Oct 2015

文青嘅秋裝精選都寫到第七回，由頭到腳都介紹過乜滯，結果香港個秋天都仲係未到(定其實已經秋緊?)。今次就介紹埋配件啦－－已經仲唔係毒物黎添！

呢個背包，係由日本50年老店「土屋鞄」所出，而「土屋鞄」除咗出各種皮製包具，最出名嘅就係出日本小學生用嘅方形書包「Randsel」－－冇錯，即係早排「鄰近經濟體」人民不停搶嘅、傳說中又識浮又有GPS嗰款。而呢款「OTONA(大人的) Randsel」就係「土屋鞄」以小學生書包改良而成。

呢個「大人的書包」總並有兩款，分別係黑色用嘅係有花紋嘅壓皮，而啡色嘅就係較為光滑嘅皮。設計上比起小學生版黎得更加扁，亦更加修長。主要置物格可以放到A4大小嘅文件或者13吋嘅Notebook，亦有兩個小置物格黎放啲立立雜雜嘢。全個背包用上牛皮所造，又高貴又有型，真係睇到人哋好心動架！

不過真係心動下好啦，因為一個要成10萬Yen，即係接近6400港紙！而且一如日本人益自己嘅傳統，並不開放以海外信用卡付款、亦唔送去海外，即係如果你要以「正途」買一個，就麻煩你本人去一次日本嘞，咁條數你識計啦？
土屋鞄