文：李羅渣　圖：telegraph, espnfc, evening standard, skysport

講個壞消息俾大家知，今個周末無英超睇；俾返個好消息你，就係今個星期足總杯又開波啦！幾支強隊都抽到靚簽，唯獨利物浦就抽中今季打強隊特別醒神嘅韋斯咸，我知你又想講乜，利物浦都算強隊？做人咪mean啦，不過我都係睇好韋斯咸可以再贏紅軍。

如果計往績呢，兩隊近幾年對碰都係平分秋色， 6次對碰各自贏3場。而韋斯咸其中兩場贏利物浦嘅比賽都係今季發生，最緊要係韋斯咸喺呢兩場勝仗都無失過波，加埋仲入左5球，真係有信心保證架。成日話韋斯咸打強隊勁，到底有幾勁？今季韋斯咸對強球隊嘅成績係5勝2和1負（強隊指阿仙奴、曼城、曼聯、利物浦、熱刺、車路士），點睇？係咪嚇死人？

如果比近況，韋斯咸仍然係好少少。最不利係原來利物浦未計呢場足總杯已係打左8場比賽，韋斯咸就只係打咗5場咁大把，體力上鎚仔已經有優勢。而且利物浦中前場有好幾位主力好似史杜列治、丹尼恩格斯、古天奴、奧歷治都出唔到，加上聯賽杯入到決賽，英超爭前四仍然有些少希望，又有歐霸杯，利物浦嘅板凳未必應付到咁多比賽，高普可能都會諗放棄足總杯，無論體力同戰意，都未必及韋斯咸。

至於韋斯咸，其實佢地一樣有傷兵，只係情況唔算嚴重，上次贏利物浦2－0嘅入球功臣安迪卡路爾又傷啦，而阿根廷中場蘭基尼都係未出得。不過今季表現唔錯嘅柏耶今場又可以上陣啦，到而家為止佢幫韋斯咸入咗6球同有4個助攻，每場平均有3.6個Key pass，絕對係鎚仔幫火力嘅主要來源；利物浦雖然都有今季表現回勇洛夫雲復出，但上次對諾域治整咗場大手交易，都反映佢哋防守仲有好多不足，我就唔睇好佢地頂到韋斯咸啦。

其實今次第四輪，好多英超列強都抽到好簽，唔計利物浦，曼城抽到對阿士東維拉已經叫麻麻地，所以英超列強出線都應該無乜問題。至於呢篇文出街時應該有結果嘅曼聯對打比郡，身為獌狗嘅我就幾擔心曼聯，希望我擔心係多餘啦。之後十六強都會見返啲強隊。但唔好嫌我長氣啦，如果有「投資」足球習慣嘅Gentlemen，足總杯呢啲經常爆冷嘅比賽忍下手好，「投資」涉及風險，要根據自己承受風險能力先好呀。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。