今日真係好重要嘅日子，除咗有聯賽盃決賽之外，仲有曼聯主場對阿仙奴，咁多好波睇仲捨得出街嘅？你問我點睇呢場，理性上，人腳比較齊全又希望搶分爭冠軍嘅阿仙奴點都睇高一線，曼聯贏波係難架啦，不過7號嘅迪比近日對傳媒講自己有反省今季喺曼聯嘅表現，仲話會向朗尼同傑斯學習，近期迪比表現真係有起色喎！愛曼聯嘅你，相信都會願意俾次機會7號仔，再擔正打正選證明自己嘅！

睇返曼聯集訓嘅相，已經見返幾位傷咗好耐嘅球員復操，好似洛祖、贊奴沙、華倫西亞，不過久疏戰陣，狀態如何真係難以估計，保守開嘅雲高爾相信都唔會喺呢場派佢哋上陣。至於阿仙奴，雖然都有張伯倫提早收咧，不過中前場人員都叫幾充足，雲加仍然可以排強陣打曼聯。

兩隊近來5場交戰阿仙奴戰績係2勝2和1負稍為有優勢，即使喺戰術上，阿仙奴都有著數。阿仙奴中前場極有創造力，奧斯爾今季交出17個助攻，紀對係今季阿仙奴可以爭冠軍嘅重要關鍵，面對阿仙奴靈活細膩嘅攻擊組合，曼聯嘅後防係好難抵擋，因為傷兵嘅問題，今季曼聯後防嘅組合差唔多場場都唔同，默契已經成疑，而且紅魔後防嘅位置感又差，完全睇唔到曼聯到底點樣擋到阿仙奴。

今場波最大花生位，我認為係倒戈嘅曼聯青訓產品韋碧克同第一次打一隊就入足兩球嘅拉舒福特。前者由奧脫福大帝變成韋碧克降臨，受傷近一年上場英超員係打咗7分鐘就有波入絕殺李斯特城，上季足總盃作客曼聯更親手送舊東家出局，今場韋大帝如果有波入，唔知會唔會慶祝呢？至於拉舒福特就因為上場歐霸盃馬迪爾熱身受傷，冷手執個熱煎堆正選上陣，點知就創造歷史，喺U18、U19、U21同一隊都入過波，阿仙奴都要提防提防呀。

睇完曼聯對阿仙奴，唔好咁早瞓住，溫布萊仲有場聯賽盃決賽等緊你！我本人就睇好曼城可以贏波捧盃，送柏歷堅尼一個美好回憶，雖然工程師先前經歷過三連敗，有評論覺得仍疑似收工mode，但係有盃，真係唔要？

估計曼聯　對　阿仙奴正選陣容

圖片：lineup11

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。