圖片：Telegraph.co.uk

國際賽期永遠係球迷慘事，一來雖然唔係話完全無波睇，不過啲波夜到都唔知通頂睇好定係眠一眠再起身睇好；二來就係擔心支持嘅球會有球員受傷，你話打球會傷都無嘢好講，但打啲無無謂謂友賽整傷個揼心程度就幾何級上升。不過間唔中都會有啲球迷熱話喺呢段時間出現。好似英格蘭上星期友賽作客德國咁，英格蘭落後兩球之下以3-2反勝德國，係自1908以來德國首次主場領先兩球下被對手反勝。英超射手榜頭兩位嘅哈利簡尼同占美華迪都有斬獲，開始有人問，到底嚟緊歐洲國家盃，仲係唔係朗尼打正選前鋒呢？

圖片：Telegraph.co.uk

其實反對朗尼打英格蘭正選，好多球迷都有講過，不過今次唔再係球迷講，而係有英格蘭同德國名宿開金口，包括拿鐵斯、夏文、馬圖斯等，個陣容都好有星味喎。至於出晒名鍾意揀大會球員入國家隊嘅領隊鶴臣竟然都話：「我從來無講過朗尼一定會有必然正選，任何人都無呢個待遇，朗尼嘅能力、經驗同入球紀錄都為佢帶嚟優勢，但唔保證佢一定係有正選。」講到咁，朗尼個正選位睇嚟坐唔穩咁喎。

圖片：manutd.com

戰術嚟講，英格蘭嘅人腳係無本事打tiki-taka或者馬體會式防反呢啲比較主流嘅戰術，反而打返自己比較擅長嘅長傳急攻比較適合，以鶴臣作風會再抄下今季英超打得好嗰隊，睇下有乜嘢可以放喺英格蘭度。不過講返高Q大棍長傳急攻打法先。其實朗尼一向頭鎚都唔係特別強，以往佢都係靠速度同高超嘅埋門技術搵食，不過肥仔已經向緊肥佬進發，速度優勢都消失緊。你話放佢打中場咩？都唔講佢成日淨係識分邊，最大問題係打反擊時個波一去到佢度唔係控到定一定先搵人交，就係轉身轉得好慢，到佢搵到人交，對方都已經回晒防，睇曼聯嘅比賽，都知佢因為咁浪費咗唔少機會。再講，英格蘭嘅中場，有更多比朗尼更好嘅選擇。

圖片：BBC

講數據，身為曼聯隊長的朗尼在正選上陣28場只有11個入球，一個正選前鋒嚟講真係完全唔合格，而佢隊有只有20歲嘅馬迪爾正選上陣37場就有入咗12球，都幾刁架下；哈利簡尼同華迪就唔使講，單計英超已經分別入咗21同19球；就算係久休復出嘅韋碧克今季只打咗5場比賽，但都入咗3球，效率好高下；而容易受傷的男人史杜列治都復出後正選11場比賽都入到7球一樣都係好選擇－－如果唔傷嘅話。即係話，朗尼今年歐國盃雖然係英軍隊長，但就算球隊要打4-4-2，朗尼都要喺球季餘下時間證明自己，睇數字，佢真係咁多個英格蘭前鋒最差嗰個。

圖片：Independent.co.uk

至於你話英格蘭有咁多高質射手，又係唔係可以有好成績？我覺得又唔好太高期望，本身英格蘭球員波底都唔係話太好，人腳嘅水平同德國、西班牙或者法國呢啲奪標大熱仲係差好遠 ，最重要就梗係鶴臣啲保守戰術，俾埋美斯你英格蘭都唔荒有運行啦。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/