圖片：toutiao.com

發覺好少喺呢度好少講個別人物，小弟雖然唔鍾意中國隊，不過由球員時代開始就好欣賞李鐵，我哋一向認識嘅中國球員，多數都係自恃畸有名氣又搵到下錢，就疏於練習，亦唔會有動力進一步提升自己嘅足球事業。不過唯獨李鐵，佢足球生涯不斷超越自己，即使而家已經開始領隊生涯，佢每一日都鍛鍊自己希望變得更強。以前都喺其他平台講過李鐵，我都好想喺呢度同各位Gentlemen介紹一位我幾欣賞嘅球員。

圖片：premierleague

大家都知李鐵有幾年時間喺愛華頓打咗兩年，第一季外借去愛華頓，雖然無波入，不過勝在夠勤力願意跑多兩步，好快就站穩成為愛華頓中場主力。好可惜第二季愛華頓買斷佢之後就飽受傷患折磨之後就只係打咗５場咁大把。唔少中國球員都會因為可以去海外踢波而自滿，不過李鐵就曾經要求時任領隊莫耶斯俾佢喺麥西塞德打比上陣，不過莫耶斯就希望佢可以留力打其他比賽，李鐵事後做其他傳媒訪問都話當時係幾失望。

圖片：sports.qq.com

李鐵掛靴之後就開始自己嘅執教生涯，而家就成為中超球隊河北華夏幸福領隊，兼成為中國隊助教。其實佢一開始喺廣州恆大做助教，待遇好之餘又可以同好多世界級領隊合作，但即使許家印落力挽留佢都堅持離開恆大，為嘅就係一嘗執教滋味，雖然呢條路係比留喺恆大更難行，不過對李鐵嚟講就非常充實，即使每日朝七晚十二咁工作，成日對住啲面對戰術板同埋比賽錄影帶。

圖片：news.sina.com

今個球季對李鐵嚟講別具意義，因為係佢正式執教鞭以來第一個喺中超嘅球季，中超又今時唔同往日，世界各地球星都雲集英超，好似一個小歐洲球壇一樣，如果河北華夏幸福今季可以有好成績，對李鐵嘅執教能力都有相當大嘅肯定。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。