圖片：The Guardian

李斯特城連個英超盃都捧埋，不過唔少球迷仍然對李斯特城贏到英超冠軍感到難以置信，關公都有對頭人，總有啲人對李斯特城神奇封王會莫名奇妙地眼紅，又話佢哋下季下定降班，又話咁少班費咁低出去打歐聯影衰英超，咁你一定覺得雲吞麵真係唔見得大場面喇。話分兩頭，球季未完，不過雲尼亞里身為領隊，對下季點部署都應該有個預算嘅。

圖片：dailymail.co.uk

雲尼亞里就講明下季聯賽會以頭十名為目標，小弟覺得呢個目標好踏實。李斯特城今季成功除咗球隊本身夠團結有默契之外，仲依賴傳統勁旅全數表現失準造成。而家唔少強隊都已經部署定下季，好似下季曼城同車路士就分別有哥迪奧拿同干地執教，新人事新作風，相信好難好似今季咁差。加上李斯特城嘅童話亦會激發唔少小球會發奮，下季英超絕對唔易打，李斯特城下季要應付歐聯戰線，絕對有增兵需要，舊有班底加上新兵都要時間磨合，英超定頭十做目標好合理啦。

圖片：Leicester City Football Club

至於歐聯賽事，唔知各位仲記唔記得十幾年前都有列斯聯打到入歐聯四強，為咗擠身前列班主又賒又借瘋狂增兵，不過最後理財不善搞到要變賣球星，降班收場。到而家仲喺英冠未上到嚟英超。對於李斯特城首次進入歐聯賽事，有咁遠行咁遠，量力而為就算啦。一來舟車勞頓非常消耗球員體力，二來李斯特城板凳唔夠，強求歐聯要有佳績只會兩頭唔到岸。列斯聯前車可鑑，不如專注啲本地盃賽，搏返個足總盃或者聯賽盃仲實際。

圖片：independent.co.uk

硬係有好多口痕友呢個時候表現與眾不同，狂踩李斯特城下季唔會贏到冠軍諸如此類，唔使你講，係人都知唔會，大家咁雀躍，係因為李斯特城喺越嚟越金本位嘅足球世界話俾大家知足球仍然充滿住愛、激情、熱血呢啲多多錢都買唔到嘅元素，佢仲俾我哋再感受體育嗰種為一剎那光榮而全力作戰嘅純粹，李斯特城亦話俾唔少處於失意嘅朋友知道，只要目標清晰，再勇往直前，就一定有贏嘅機會，淨係呢樣嘢已經值得我哋為李斯特城高興，起碼呢季。