圖片：Julian Finney/Getty Images

阿仙奴傳奇中場路斯基今季只係幫球隊上陣過1次咁大把，領隊雲加亦事先張揚呢個捷克國腳季尾就會同阿迪達、法明尼一齊離隊，好多阿迷覺得路斯基喺球場上積極同勤奮嘅態度係而家槍手好多球員都無嘅，所以路斯基就算近年飽受傷病困擾，阿仙奴球迷仍然好支持佢。今季路斯基離開酋長球場，本來球迷就好大機會睇唔到路斯基踢波。不過，路斯基就入選咗捷克歐洲國家盃嘅28人初選大軍名單，真係路斯基迷嘅喜訊呀！

圖片：sport-express.ua

而家嘅捷克同以前尼維特真高拿時代的確係無得比，留意返個大軍名單，好多都已經名不經傳，阿仙奴門神施治入選當然唔使意外，路斯基今季喺阿仙奴只係1月時足總盃對般尼時有上陣，但又好快受傷。當然啦，蜀中無大將都係路斯基入選嘅原因之一，不過唔理啦，仲有機會喺球場上見到呢位傳奇人物踢波，仲想點呀？

圖片：Goal.com

好多球迷都埋怨雲加點解唔俾多啲機會路斯基上陣，但路斯基就一句怨言都無。今季一月足總盃比賽時後備上陣3分鐘就足踝受傷，不過佢同雲加講「我會繼續留在場上，因為你已經用完所有換人名額，不能再變了。」，最後帶傷完成比賽。而家足球世界人情紙咁薄，有啲球員為打重要比賽仲會錫身留力，路斯基係絕無僅有嘅球壇清泉，難怪球迷咁like佢嘅。

捷克歐國盃初選28人大軍名單如下

門將：施治（阿仙奴）、華歷克（巴素利）、古碧克（利巴域）

後衛：謝比施拿斯（雲達不來梅）、胡巴歷克（柏辛域陀尼亞）、卡達拉碧克（賀芬咸）、卡達歷（費倫巴治）、林巴斯基（柏辛域陀尼亞）、普迪爾（錫周三）、蘇捷（巴素利）、施禾克（貝沙）、沙赫斯度（布拉格斯巴達）

中場：達列達（哈化柏林）、多卡爾（布拉格斯巴達）、丹尼爾高拿（柏辛域陀尼亞）、高華歷克（柏辛域陀尼亞）、卻積斯（布拉格斯巴達）、馬列錫克（布拉格斯巴達）、柏禾卡（卡斯帕薩）、柏拉斯（波爾多）、路斯基（阿仙奴）、史加勒（白禮頓）、祖錫夫蘇路（布拉格斯巴達）

前鋒：拉法達（布拉格斯巴達）、尼斯特（貝沙）、舒克（波希米亞人）、史高達（布拉格斯巴達）、馬迪維達（雷丁）

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演

員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。