圖片：mirror

一支英冠球隊可以升上英超點都係喜事嚟，不過以附加賽冠軍身份上英超嘅侯城，今季一場英超都未打已經多災多難，領導層無能今個轉會窗一個人都無買過，又因為咁引起一向同球隊管理層不咬弦嘅領隊布魯士辭職，仲有傷兵問題，升班馬未開局就一身蟻都算近年少見，相信侯城士氣都唔好得好去邊，今晚對衛冕英超冠軍嘅李斯特城，大家有心水啦。

圖片：telegraph

相信大家對布魯士都唔會陌生，2014年帶領侯城殺入足總盃決賽，雖然加時輸咗俾阿仙奴，但都已經成為球迷心目中嘅英雄，即使侯城保留住大部份由英超帶落嚟嘅成員都唔可以直接升班。因為增兵問題已激嬲布魯士辭職，除咗少咗個有壓到場嘅領隊之外，更加係將球迷推向對立面。咁無領隊咪搵囉，本來侯城就屬意威爾斯領隊高文接手，不過就俾威爾斯足總拒絕，而家侯城只係搵副領隊費倫做看守領隊。而最新傳聞就係侯城想搵車路士傳奇蘇拿執教。

圖片：Curtis Davies on twitter

侯城完咗球季有不少球員嚴重受傷，季前球隊一度只有14位球員可以作賽，不過熱身賽都有6勝4和1負。不過今季英超除咗係超級領隊大戰之外，好多球隊買人好似唔使錢咁，連愛華頓想買水晶宮翼鋒保拿斯都要三千萬鎊，而侯城就定過台油，唔好話無done deal，連轉會傳聞都唔多覺，同一樣係升班馬嘅米杜士堡真係天淵之別，咁難得上英超唔係咁快想下季重返英冠爭聯賽冠軍掛？侯城後衞居迪戴維斯之前喺網上post咗張喺奧地利集訓時九位球員嘅合照，有網民就講笑話呢個就係侯城新球季嘅陣容。侯城嘅傷兵雖然都好得七七八八，不過狀態真係成疑，而且實力無增加之下，未開季已經要擔心護唔到級。

圖片：dailymail

自侯城升班之後一直有消息，有個由中國同香港商人組成嘅集團好想買侯城，不過一直只聞樓梯響，其實班主艾森阿倫明顯無心搞又唔想搞，不如快啲賣盤。不過而家距離轉會窗關閉得返兩個禮拜，俾你轉埋手有錢買十個普巴都無用，睇怕來季英冠席位都留合個位俾侯城。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。