圖片：Skysport

香港次次財政預算案都有人鬧財爺守財，阿仙奴球迷就每個轉會窗都鬧雲加點解唔買人，係人都知雲加同曾俊華一樣咁孤寒。而且咁多年都歐聯十六強出局，點都想有到突破。而家終於俾一眾阿迷恨到，因為雲爺爺喺星期四賽前記者會就話阿仙奴準備使錢買人架啦。阿迷們開唔開心？興唔興奮？

今季阿仙奴轉會窗都係交投淡靜，除咗一早買咗嘅瑞士中場夏卡同喺廣島三箭買入嘅日本奧運隊前鋒淺野琢磨就無任何收購，淨返嘅都係得個傳字。連水晶宮喺利物浦買賓迪基都用成三千萬鎊，都知道今季英超亂過亂世佳人，而阿仙奴先後想買嘅目標唔係俾人截胡就同球隊續約，其實阿仙奴一路都想買返個高產射手，但而家選擇都唔係得返好多。

圖片：Skysports

相信阿仙奴球迷上星期睇完輸俾利物浦3:4場波，都好擔心球隊嘅防守，事實上年紀有返咁上下嘅梅迪薩卡都好難再有長期穩定表現，加埋基比爾需要養傷，所以中堅都係阿仙奴想加強嘅位置，之前就傳雲加想買上季西布朗嘅最佳球員伊雲斯，咁當然係俾阿迷鬧到趴喺度啦。而且西布朗都唔肯放人，因為覺得伊雲斯唔止值千六萬鎊咁少喎。不過相傳阿仙奴都有另一個比較對辦嘅人選，就係華倫西亞中堅梅斯達菲，仲要二千萬鎊就落到樓，只係到而家都無任何消息可以確定阿仙奴係出過報價，或者傾緊個人條件咁。

圖片：Skysports

講開阿仙奴，都要講下阿仙奴另一個目標馬列斯，馬列斯繼華迪之後成為另一位阿仙奴嘅險簽球員，為李斯特城已經同馬列斯續約到2020年。而李斯特城今季留住人腳嘅工作都叫出色，上季奪冠主力只有防中簡迪轉投車路士，不過雲尼阿里以文迪或者安迪京治頂替簡迪效果都係麻麻，轉會窗得返唔夠兩個星期，都可以諗下買多個硬淨嘅搶截型中場嘅。

 李羅渣(facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。