李羅渣 - 巴神歸位

文：MenClub 魏文青　　
POSTED ON 15 Sep 2016

圖片：Skysport
由意大利天才射手變成地底泥嘅巴神巴洛迪利，唔止落選今屆歐洲國家盃意大利23人大軍名單，連自己效力嘅利物浦都不計成本要佢走人，法甲球會冷手執個熱煎堆免費得到巴神加盟，巴神都知自己年紀唔細，未去尼斯都講定希望以金球獎為目標，你唔好理佢呢個目標係咪不設實際，但起碼佢有改變一路走下坡嘅足球事業。皇天不負有心人，上星期法甲聯賽，巴神首次為尼斯上陣就連入兩球幫球隊以3-2贏馬賽排榜首，你睇下巴神入完兩球個樣幾得戚。
圖片：thefirsteleven
巴洛迪利論條件絕對係一個上佳前鋒，有高度、夠強壯、埋門能力又好，大家最記得係佢首次正式上陣後有好長時間未曾射失過十二碼。大家都知佢喺國米成名後，2010年就轉會去曼城同師父文仙尼故劍重逢，大家最記得就係佢第二季喺曼城打曼市打比連入兩球，仲show埋件印咗「why always me?」嘅打底衫。但呢季之後就係佢走下坡嘅開始，後來佢兩度效力AC米蘭同利物浦，表現令人非常失望。
圖片：mirror
或者係因為不快嘅童年令巴神脾氣古怪，古怪嘅脾氣係佢力量嘅來源，但同時又可以毀滅佢自己。巴洛迪利跟咁多領隊好似都係得文仙尼治得佢掂，但可以可以肯定嘅係巴神係受軟唔受硬型，對佢循循善誘仲可能帶彎轉，但俾面口佢睇就一定無貨交，早排巴神接受訪問就話除咗球迷同隊友，基本上對利物浦十完全無留戀。呢個又真，利記名宿加歷查一時又話送巴神俾佢都唔簽，一陣又叫利物浦賣佢去中超。不過星期日嘅比賽之後加歷查twitter就俾人洗板問佢收唔收返之前嘅說話。
圖片：goal.com
而家巴神去咗尼斯，無以前打四大聯賽咁多人留意對佢翻身點都係好事，而第一場比賽就贏波自己仲要有重要貢獻可以加強佢信心，只係成季流流長，當然唔可以咁快話佢一定會一帆風順，而佢今次態度都俾以前轉會積極得多，巴神可唔可以拎金球獎就唔知，不過如果佢乖乖地踢波，唔好搞咁多嘢係有時間翻身，哥利斯馬都得，何況巴神只係26歲？
李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。