bleachreport

呢個中秋曼聯球迷應該都唔多好開心，因為中秋正日同星期日晚曼聯分別喺歐霸盃同英超輸俾飛燕諾同屈福特，令摩連奴執教生涯首嘗三連敗滋味。而輸俾屈福特更係30年以來首次。明明開季三連勝係威係勢，點知一輸俾曼城就全隊走樣。其實費sir之後曼聯已經換到第三個領隊，人腳有變，戰術有變，可惜嘅係態好似無乜點變，曼聯上下都好似已經覺得無得爭冠，表現飄忽係好正常。如果咁搞，唔好話摩佬教，就算係摩佬買埋美斯同C朗一齊嚟曼聯，表現相信都唔會差太遠。

dailymail

以前費sir教嘅曼聯，人腳如果要同其他歐洲列強比，可以話係中規中矩，唔算太強，不過佢哋都有一個同通點，就係有種永不放棄嘅堅持，同埋為球隊戰鬥到底嘅決心，好似堅尼、李奧費迪南，阿倫史密夫之類都有呢啲特質，實力唔夠，努力搭夠，跑多兩步就可以由輸變和、和變贏。費格遜嘅爭勝心都一樣感染到球隊，以前你睇曼聯，球隊一落後佢真係黑晒口面，成身震晒咁。仲有個江湖傳聞係，費sir連賽馬都唔輸得，試過因為自己愛駒直布羅山輸咗比賽，喺電視節目嬲到爆粗，費sir真係乜嘢層面都咁想贏。

manutd

所以曼聯其實唔一定要大牌，反而要啲好波得嚟無乜名氣就fit晒，摩運奴喺回應呢次低潮就話楊格喺輸俾屈福特嘅比賽之後仍然可以保持正面態度，仲要其他球員好好向佢學習，另外季初打出身價嘅中堅拜利亦係呢一類，不過暫時就字見到佢展現良好心態嘅一面，反而普巴就真係幾令人失望，雖然佢口口聲聲話唔會俾自己身價影響，但幾場都未入到波，好明顯有啲急燥爭表現，結果都係幫唔到球隊，相信摩佬都係時候搵普巴傾下計。

eurosport

另外今日英國太陽報就話嚟緊對李斯特城嘅英超賽事會收起朗尼，不過太陽報講嘅就聽下算啦。不過英國有網站就做咗個調查問球迷希望下場朗尼擺去咩位置，點知有近99％球迷都話要擺朗尼去後備。朗尼出晒名係英格蘭足球象徵，無論表現將差，英格蘭球迷都會幫佢講嘢，而家佢個處境同我哋特首都係差唔多，一樣眾叛親離。

李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。