英超曼聯又輸一場！車路士星期日喺史丹福橋大勝有摩連奴倒戈嘅曼聯4-0，車仔一眾球員對舊領隊就乜仇都報晒，難為全世界曼聯球迷俾人笑咗足足兩日。後費格遜時代換咗三個領隊，又使咗大大筆錢，換嚟嘅係俾車路士大炒，魔迷擔心係好正常，利申下，星期日我出咗街睇唔到波，亦無眼睇重播，輸4-0俾同級對手已經好勞氣，最令人憤怒係一班球員輸波仲笑笑口，走去同車路士球員social同交換波衫，唔知以為係曼聯贏波。

前助教同傳奇傑斯都非常不屑一班前隊友所作所為，佢話，當你輸波要做嘅除咗係恭喜對手同多謝球迷之外，就係盡快離開球場。但畫面見到嘅係伊巴謙莫域四萬咁口同人交換波衫，馬迪爾同國家隊隊員簡迪吹水，馬達好啲嘅，同車仔舊隊友打個招呼就算。唔係話輸波就要好似死老豆咁，不過唔係好似打完友賽咁款。唔諗下隊波都諗下球迷感受呀。

曼聯嘅死亡十月就快過去，不過車仔場波賠了夫人又折兵，一直表現穩定嘅艾力拜利膝頭受傷，而且傷勢唔輕，睇嚟呢個造波勁閂波準嘅中堅都有段長時間要休息，代替佢嘅只有長期養傷嘅菲爾鍾斯同埋打中堅表現麻麻嘅洛祖，至於白蘭特就無謂講啦，其實有啲唔算難打嘅比賽可以俾科素文沙試下上陣，反正呢個都係最聯明日之星，上面講嘅後防都令人難以放心，俾個機會文沙可能有意外驚喜。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青