勁呀！英超曼聯已經5場聯賽不敗——不過係1勝4和嗰隻「不敗」，而且對比前兩任領隊同期成績，摩連奴仲係最差嗰位。當連阿仙奴山齊士、禾確特同奧斯爾三個加埋嘅入球都多過曼聯全隊，聯賽盃同歐霸盃打得幾好都無意思啦！咁嘅成績令到有球迷開始歸咎摩佬執教能力回塘，當然唔少得最廉價嘅「換領隊」呼聲。只係好似我先前所講，經過三任領隊之後，曼聯嘅問題真係唔單單喺領隊身上，曼聯而家需要嘅，係「後費格遜」年代嘅新方向。

講少少上星期愛華頓對曼聯場波啦，好多人將和波責任賴去摩連奴完場前保守地換入費蘭尼導致輸12碼。但唔好話你有無踢過波，就算打機你都知，到底球隊有無能力入多一球，你係感覺到。上場波好明顯曼聯係唔會再入到多一球，而愛華頓就希望用高波搏入多球拎一分，咁換爆炸頭出去頂多陣袋三分係好合理，要怪嘅係費蘭尼，點解打咗咁多年啲防守技術仲係咁粗疏，臨完場輸返球12碼俾對手。以前曼迷好唔鍾意佢，成日話有價好賣，呢次我都撐佢唔落。

另一個問題就喺普巴身上，當盛傳曼聯會總以天價回購呢位法國中場時我都唔係好贊成，但既來之則安之，既然已經係曼聯嘅球員，當然希望佢幫到球隊。雖然佢喺facebook多次表明非常尊重曼聯同希望作出到貢獻，不過佢仍然係死扭多過食飯，但環觀數字佢又係全隊創造到最多機會嘅球員，如果肯改改啲壞習慣，應該對球隊有更大幫助。但曼聯最應該考慮嘅係到底有冇需要跟皇馬咁「一年一星」，定退而求其次去買啲實而不華又鬥心強嘅球員？甚至好似雲高爾咁提升一啲有潛質嘅青訓上一隊，同一隊嘅大帝們良性競爭？

到家為止，我仍然認為摩佬應該有2到３年時間重建球隊，因為換咗三個領隊之後其實已經證明咗換領隊係唔work，咁反正而家曼聯都無可再差，放手一搏可能係好事。而且摩佬嚟到曼聯的確比起之前喺車仔、皇馬時有所唔同，除咗肯為作客車路士大敗道歉之外，本來話到明今季唔會得到任何上陣機會嘅舒韋恩史迪加都跟返一隊操練，對韋斯咸嘅聯賽盃賽事仲有上陣添。而家曼聯前四好似已經無乜可能，不過如果摩連奴能夠帶領曼聯搵到新方向，呢季仍然係有睇頭嘅。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。