英超曼聯又和一場！上輪英超作客史篤城，上半場就因為馬達擺鳥龍先失一球，要靠朗尼喺補時階段整球世界級罰球先可以追和1-1拎返一分。而呢球對朗尼嚟講就更加別具意義，因為佢憑住呢球正式超越卜比查爾頓成為曼聯史上入球最多嘅球員。其實近呢三年有人戲稱朗尼做「肥西」，因為無論佢嘅表現同態度都滿足唔到球迷，加上莫耶斯任領隊時佢趁火打劫續咗份天價肥約，令唔少球迷對佢都好不滿。不過因為呢球，唔少支持朗尼嘅聲音又出返嚟。當然，能夠幫一隊球隊入到250個入球，絕對係成就之一，但以朗尼嘅天賦，成就其實可以唔只咁少，唔少朋友批評佢，恐怕係恨鐵不成鋼。

朗尼喺2002年就以16歲之齡就已經為愛華頓一隊上陣，成名作相信大家會記得係2002年10月主場對阿仙奴嘅比賽，一腳25碼遠射入球。之後曼聯就以2700萬鎊簽入呢位英格蘭神童，多年黎帶領曼聯贏咗5個英超冠軍，08年佢與C朗拿度同泰維斯組成嘅三叉㦸更加係曼聯球迷J到今時今日嘅美夢，佢自己亦成為英格蘭足球嘅代表人物。

近年有唔少球迷都批評朗尼表現，尤其係速度下滑，當然小弟都有份。客觀嚟講，肥仔都已經三字頭，加上所受傷患都唔少，要佢好似以前咁以速度同力量壓過對手取得入球又真係有啲難。加上費sir又一度試圖將佢轉型做攻擊中場同右翼鋒，對佢嘅表現都有影響，最後就搞到佢經常被領隊安排打中場中。但表現差球迷未必最介意，跳草裙舞就唔會咁易放過你。最近一次就係費sir退休嗰一季，兩個人連當時接受英超冠軍獎牌時都無乜交流，坊間就一度盛傳朗尼會轉會車路士，到莫耶斯接任，為留住球星先有「30萬鎊週薪」續約事件。

有幸見證卜比查爾頓維持40幾年嘅入球紀錄被打破當然高興，不過食君之祿，擔君之憂。球迷期望朗尼交出同週薪相符嘅表現係好合理，而呢三季朗尼有無做好本份，大家都心裡有數。自從摩連奴嚟到曼聯，朗尼好似聽教咗，唔介意做後備之外，上陣時都有神來之筆。平心而論，只計近期表現絕對可以畀佢重返正選。事實上以朗尼嘅天份，如果願意約束自己飲食習慣同勤力訓練，成就唔會同前對友C朗拿度差得太遠，一切都只係睇佢想唔想做而已。對朗尼疑中留情，可以講係近來看待朗尼最公平嘅做法。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。