2014年世界盃決賽幫德國入波踢走阿根庭捧盃嘅功臣葛斯，自上季加盟拜仁慕尼黑到今季重返多蒙特，都好似無乜好日子過。上季季尾喺拜仁被投閒置散，仲有傳佢可能跟隨恩師高普轉會去利物浦，不過最後佢仍然揀咗留喺德國重返多蒙特。但回家之後佢上陣機會亦唔算多，德甲上陣11次只係交出1個入球同1個助攻。近日多蒙特官方仲發表聲明表示葛斯患上罕見肌肉代謝疾病要無限期休戰，真係命苦。

葛斯重返多蒙特之後並無好似大家預期咁浴火重生，仲一直有傳呢位世界盃功臣同領隊杜曹不和，不過杜曹就表示自己係對事唔對人。德國盃十六強對哈化柏林都無份打，歐聯十六強對賓菲加又因傷缺陣，就連德國名宿都為葛斯前途擔心，而家仲話連外國球會對佢都無興趣，長此下去如果想以呢個狀態keep住而家嘅人工，睇怕就要去中超。短短幾句說話講咗葛斯球場上嘅困境，點知依家佢仲有個肌肉代謝病，真係唔知又要搞幾耐啦。

葛斯而家呢個病係咩嚟？睇返資料原來肌肉嘅新陳代謝疾病有成十幾種，而多蒙特就無提及葛斯患嘅係邊種。不過主要黎講，呢種病嘅成因係因為基因損壞而造成肌肉病變。原本人體進食之後啲營養仲要喺細胞以酶進一步分解，以便俾細胞嘅線粒體製作成能量份子ATP，而肌肉就需要ATP先可以運作。而呢種病就係令細胞中嘅酶減少，做唔到ATP，令肌肉無力，運動時會產生疼痛同容易抽筋。好就好在呢種病如果係成年時發病，問題就唔大，只要改變下飲食同生活習慣就OK，係要啲時間咁囉。

球員被怪病纏擾，葛斯當然唔係第一個。例如前曼聯中場費查喺2011﹣2012年球季時就忽然患上潰瘍性結腸炎，搞到體重暴跌，仲一度以為需要掛靴，後來到2013年做完手術先至可以復出，雖然叫做保住佢足球生涯，但水準都大不如前。當然而家葛斯嘅病情到底係點無人知，好就好在以葛斯嘅年紀，如果可以康復嘅話，就算要操返起狀態都唔係無可能。

李羅渣(facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。