好快就係特首選舉投票日，各候選人為求爭取「民望」都可以話無所不用其極，香港足球代表隊近年深受市民愛戴，佢哋又點會放過呢個抽水機會？話說星期一其中一位候選人林鄭月娥就突然現身港會球場，為準備去約丹友賽嘅佢哋打氣。不過門將葉鴻輝就不以為然，表示嚟打下氣無意思，香港足球需要嘅係實質支持，林太同佢打招呼佢仲拿拿淋彈開添。咁又係呀，選舉先嚟做show，以前老細話體育無經濟貢獻又唔見你幫香港運動員出下聲，畀著我係英雄輝，點止彈開咁簡單！

如果上google搜尋「林鄭月娥」同埋「足球」，你會發現除咗星期一嘅新聞，就要去到2012年8月佢以政務司司長身份時出席「無家者世界盃慈善頒獎典禮」，當時佢就話足球可以幫無家者建立信心同自尊。但除此之外就再無見到「奶媽」有同足球甚至任何體育運動嘅新聞出現過。政務司轄下嘅民政事務局搞咗個「鳳凰計劃」3年使咗6000萬，除咗養咗一大班冗員同埋搞咗個九唔撘八嘅港超聯之外，基本上就一事無成：球隊繼續無地方訓練，球場繼續無，甚至聯賽入場觀眾一度比計劃前更差。林太都仲有面走入足球場半步，同港腳講自己好支持香港足球發展，都真係需要好大勇氣。

咁另一候選人、前財爺曾俊華呢？其實都唔係好好多架咋！曾俊華喺世界盃外圍賽時多次為香港隊加油，連飛到去羅馬尼亞開會都識用iPad上網睇波，的確比其他一眾官員可取。不過身為庫房大掌櫃，一樣唔見得佢有為香港足球提供實際支持。舊年嘅財政預算案只有第75段係與體育有關，亦只係提及2012年政府成立嘅精英運動員發展基金成效如何。至於足球呢？成份財政預算案係完全無被獨立提起過。可能薯片叔叔都係always agree with his boss，無乜經濟貢獻嘅嘢，就無謂浪費金錢嚟搞。

兩位候選人近日提起香港足球，其實只係一場公關「表演」，事實上三位候選人都冇認真提及過香港體育以至足球發展嘅問題。相信只要選舉一過，佢哋就更加唔會提起。要支持香港足球，目前最有效嘅方法都係靠球迷行多步，入場睇波支持香港隊以至本地聯賽就係我哋做到最實質嘅支持。另外，傑志石門訓練中心被收地建屋件事其實仲未完結，大家一定要留意事態發展，唔係一個唔該，香港足球以至體育又會返返去「無經濟貢獻」嘅地位。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。