尋日睇到兩篇關於香港搞五人足球（細球）嘅新聞，話說有位小學老師覺得因為香港嘅土地問題，令我哋好難搞好十一人足球（即係俗稱大球），所以發展用地較細嘅五人足球，可能係香港足球嘅出路。的確，以前香港係細球真係威過，1992年主辦五人足球世界杯仲喺分組賽贏過尼日利亞，但如果期望發展細球可以帶領香港足球進步，感覺上就有啲「走精面」。

的而且確，唔少歐洲球會嘅訓練都會加入細球比賽，細球節奏快、場地細、無明確嘅位置同分工，講求球員即時決斷力同技術，的確係唔錯嘅訓練方式。但當去返大球，細球所學到嘅嘢只係大球嘅一少部份。例如大球更講求組織，每個位置之間都有唔同嘅作用，比賽嘅變化又較多，最重要係大球踢足90分鐘，對體能同耐久力有非常高要求，相反節奏明快嘅細球需要嘅係爆炸力。至於球例就有更大分別，最少細球就唔會有越位（雖然小弟讀書時同過啲大陸朋友踢七人場，佢哋會玩越位），如果依賴細球去訓練球員踢返大球，隨時開錯個頭。

又當「學細球搞好大球」呢條路真係行得通，但去到最後一樣要面對講都口都臭嘅土地問題。先前嘅文章都講過鳳凰計劃搞咗3年洗足6000萬球場都無多過。以現時社會環境，即使有地政府第一件事都會考慮要嚟起樓。雖然足總亦可以鼓勵一啲有自己場地嘅球會，例如南華、港會等效法傑志石門中心，騰出一部份時間借出予公眾人士使用。但要搞好香港足球，除咗要有人落場之外，政策配合一樣重要，長遠嚟講，政府搵地起球場呢個問題係無得逃避。

雖然小弟覺得想搞好香港足球點都要腳踏實地由大球搞起，靠小球走捷徑並不可取。不過相信訪問入面嘅盧sir都係有心人，一心想為香港足球出一分力。有時去街場睇下人踢波，有技術有心踢嘅其實大有人在，但就林林總總嘅原因令佢哋唔可以一展所長。或者足總可以搵鄰近地區球會合作，將香港小將送去試訓，可能會更有用。唔知各位gentlemen點睇？

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。