「無啦啦」教你點氹女仔

文：MenClub Mean娜　　圖：MenClub
POSTED ON 16 Sep 2014

女孩子嘅心情變幻莫測，就好似天氣咁反常，一時陰天一時晴天，但更多時候，水造嘅女孩子都會因為小小事就變成雨天。係男人都應該都試過，心儀嘅女孩子同男朋友分手，又或者遇到唔開心嘅事，終日鬱鬱寡歡，然後你嘅大男人心態作祟，好想守護佢氹佢開心，但又唔知點做先可以含蓄地關心佢，唔會令佢有「我一分手你就想追我？」嘅戒心。
女人嘅事最好就問返女人。唔講唔知，香港有間「無啦啦有限公司」，專為氹女仔而設。Vene曾經有位好朋友受過失戀重創，當時佢朋友成日屈喺屋企冇心情出街，令Vene非常擔心佢，希望可以送啲禮物為佢打氣，但坊間大部分禮物都係為慶祝或者求愛而設，安慰人嘅禮物少之有少。當時Vene心諗，其實好多人都會經歷失戀，應該要有啲禮物可以Cheer Up佢哋，於是就有開Cheer Up禮物店嘅想法。


女仔的確係好容易無啦啦就唔開心，所以Vene就將自己間公司叫做「無啦啦有限公司」，但原來背後仲有一個Meaning，就係想話畀人聽，呢間公司非常幽默，送嘅禮物都好有Surprise。Vene作為一位女性，覺得通常男人氹女人，都係離不開用花做主打，但好多時送花都會係用嚟求愛或者道歉，如果你無啦啦送花畀心儀嘅女性，可能佢會覺得太「厚禮」，覺得你係咪想追佢而起戒心。Vene會同一班好姊妹一齊商量，究竟點嘅禮物先真正可以氹得女仔歡喜，又唔會尷尬。佢哋會設身處地諗自己唔開心時收到咩禮物會覺得Warm。於是「無啦啦」嘅禮物就行兩條路線，一個係玩幽默，一個係行窩心路線。

Vene覺得女仔唔開心嘅時候，都需要發洩。「無啦啦」其中一個最受歡迎嘅禮物就係「巫毒公仔」，公仔有個位可以畀你放相，上面寫滿咒罵Ex嘅字句，附送埋大頭針任你吉。試過有位男士激嬲女朋友，於是將自己嘅相放入公仔入面，畀女朋友喪吉公仔發洩，最後成功氹返女朋友，不過位男士自己有冇事？就不得而知喇。

另外亦有一系列明信片，寫住搞笑嘅句子，例如「Relationshit」，當你寄畀心儀嘅女仔時，除咗有你寫嘅心意之外，仲可以透過明信片安慰佢「愛情算什麼！」

女仔唔開心可能就會成日委喺屋企瞓到天昏地暗，呢個絲造嘅眼罩上面印有「Fuck That」，提醒佢瞓完一覺就要將唔開心嘅事拋諸腦後。

除咗瞓，女仔一唔開心就係食，呢排朱古力寫滿Ex Boyfriend呢啲字句，就係畀個女仔寫完個朱古力就好似將失戀嘅事食埋落肚咁，唔好再諗。

除咗幽默系列嘅禮物，「無啦啦」仲有好Warm嘅禮物。呢個蠟燭臺寫住「Past」，意思係一把火將過去唔開心嘅事燒晒佢。

另外呢個「幸運曲奇」形狀嘅盒，裡面放咗一啲安慰字句，令個女仔一打開就見,到呢啲字句勉勵自己。

最後就係「無啦啦」最受歡迎嘅氣球盒子，個氣球會收喺個盒裡面，個女仔一收到打開，氣球就會連埋你寫嘅心意卡徐徐向上升，相信冇女仔見到會唔冧豬。