毒L們，據說聽日就係一年一度嘅毒L受難節（平行宇宙入面稱為情人節），我唔知你受難咗幾多次，亦唔知你有冇耶穌受難咁慘烈，總之除咗深表同情之外，我都唔知講咩好。

Hey Guys，咪再跟班巴打唱「其實毒L一個更開心」喇，呢句嘢同班韶華老去嘅賣剩港女講「我唔急」、「我唔恨」、「我唔需要愛情」一樣咁虛假！問心，你是咪真係想無女終老、孤獨一生先？勇敢踏出第一步，離開comfort zone，識番個女朋友吧！

談吐
大方、主動、親切、有眼神接觸，加多少少幽默感，呢啲會令女仔對你加分，就係人都知㗎啦，但真係要做到囉，唔該返去練吓。自問天生幽默感不足嘅話，Frankie真係建議背定幾個笑話傍身（唔係爛gag喎）！男士應該一見到女參加者就主動打招呼，唔好見活動未開始就掛住玩電話！

參加者唔出聲係最致命（雖然speed dating公司員工有責任幫參加者打開話題），不過太多嘢講亦未必係好，Frankie話好睇個人講啲咩，如果全部係冇point嘅廢話，或者狂講工作上嘅嘢，但佢份工其實係好悶，咁一樣好趕客。